Anadolu Agency-ის ცნობით, აშშ-მ თურქეთის მთავრობას შეატყობინა, რომ ის შავ ზღვაში 2 სამხედრო გემს გამოგზავნის. ეს გადაწყვეტილება აშშ-მ უკრაინასა და რუსეთს შორის მზარდი დაძაბულობის ფონზე მიიღო.
გასულ დღეებში, აშშ-ს თავდაცვის ოფიციალურმა პირმა CNN-თან თქვა, რომ ამერიკა შავ ზღვაში გემების გაგზავნას განიხილავდა.ოფიციალური პირის თქმით, მართალია, აშშ-ს ფლოტი რუტინულად იმყოფება შავ ზღვაში, თუმცა სამხედრო ხომალდების გაგზავნა კონკრეტულ გზავნილს გაუგზავნის მოსკოვს, რომ აშშ ახლოდან აკვირდება მოვლენებს.
“ჩვენ 15 დღით ადრე დიპლომატიური გზებით გაგვაფრთხილეს, რომ მონტროს კონვენციის შესაბამისად, აშშ-ს ორი სამხედრო გემი შავ ზღვაში შემოვიდოდა” – თქვა თურქეთის ოფიციალურმა პირმა, რომელსაც ანონიმურობის შენარჩუნება სურდა.
წყაროს მიხედვით, აშშ-ს გემები დანიშნულების ადილს 14-15 აპრილს მიაღწევენ და შავ ზღვას 4-5 მაისს დატოვებენ.
მონტროს კონვენციის მიხედვით, ბოსფორისა და დარდანელის სრუტეების გავლისას, აშშ ვალდებულია თურქეთი წინასწარ გააფრთხილოს. ასევე, ამავე შეთანხმებით გაწერილია სამხედრო გემების შავი ზღვის წყლებში გაჩერების ვადები არაშავიზღვისპირეთის ქვეყნებისთვის.
Loading ...
