ევროპის საბჭოს საპარლამენტო ასამბლეამ უკრაინელი ბავშვების რუსეთში დეპორტაცია გენოციდად აღიარა. ასამბლეამ 87 ხმით 1-ის წინააღმდეგ, რეზოლუცია ხუთშაბათს მიიღო სტრასბურგში მიმდინარე საგაზაფხულო სესიაზე.
დოკუმენტში აღნიშნულია, რომ დონეცკისა და ლუგანსკის რეგიონების დროებით ოკუპირებული ტერიტორიებიდან უკრაინელების რუსეთის ფედერაციაში უკანონო გადაყვანის პრაქტიკა დაიწყო ჯერ კიდევ რუსეთის ფედერაციის სრულმასშტაბიანი აგრესიის დაწყებამდე, ბავშვთა სახლებიდან ბავშვების, შეზღუდული შესაძლებლობის მქონე ბავშვები სპეციალიზებული დაწესებულებებიდან დეპორტაციის სახით.
ევროპის საბჭოს საპარლამენტო ასამბლეამ მოუწოდა საერთაშორისო სისხლის სამართლის სასამართლოს განიხილოს ამ დანაშაულისთვის სისხლისსამართლებრივი დევნის შესაძლებლობა.
“ასამბლეა ასევე მხარს უჭერს გენოციდის დანაშაულის მტკიცებულებების ფრთხილად აღრიცხვის, შეგროვებისა და შეფასების აუცილებლობას, როგორც ეს გათვალისწინებულია რომის სტატუტითა და გენოციდის კონვენციით.
ასამბლეა მხარს უჭერს რუსეთის ფედერაციის მიერ უკრაინელი ბავშვების იძულებით გადაადგილებისა და დეპორტაციის სახელმწიფო პოლიტიკის გამოძიებას და პასუხისმგებლობას, ასევე უკრაინის პოტენციურ ქმედებებს სისხლის სამართლის საერთაშორისო სასამართლოსა და იუსტიციის საერთაშორისო სასამართლოში“, – ნათქვამია დოკუმენტში.
Loading ...
