უკრაინაში ქალაქი პოჩაევი მართლმადიდებლურ მონასტერში კორონავირუსის გავრცელების გამო დაკეტეს. პოლიცია მოსახლეობას ქალაქში შესვლა-გამოსვლის უფლებას აღარ აძლევს. ქალაქში 8,000 ადამიანი ცხოვრობს.
პოჩაევის ლავრაში კორონავირუსის გავრცელების შემდეგ ქალაქში ათობით ადამიანი დაავადდა. გარდაცვლილთა შორის არიან ბერებიც.
აღდგომის დღესასწაულზე ადგილობრივმა მთავრობამ სასულიერო პირებს მოუწოდა ლავრა მრევლისათვის დაეკეტათ, თუმცა, მიუხედავად აკრძალვისა წირვას ასობით მორწმუნე დაესწრო.
პოჩაევის ლავრა 5 საუკუნეა არსებობს და ყოველწლიურად მას პოლონეთიდა, მოლდოვიდან, რუსეთიდან და ბელარუსიდან ასობით ათასი პილიგრიმი სტუმრობს. ამჟამად ლავრა დაკეტილია. თავდაპირველად მონასტრის წინამძღოლები უარყოფდნენ, რომ იქ კორონავირუსი გავრცელდა, თუმცა მარტში მოლდოვის პრეზიდენტმა იგორ დოდონმა განაცხადა, რომ პილიგრიმობის შემდეგ რამდენიმე ადამიანი კორონავირუსით დაავადდა.
კორონავირუსი გავრცელდა დედაქალაქში მდებარე კიევ-პეჩორის ლავრაშიც. 13 აპრილის ინფორმაციით, ლავრაში ვირუსით 63 ბერი იყო ინფიცირებული. ლავრის საინფორმაციო სამსახურის ცნობით, დაღუპულია 3 სასულიერო პირი.
კიევ-პეჩორის ლავრას მიტროპოლიტი პაველი ხელმძღვანელობს, რომელსაც მხარს რუსეთის საპატრიარქო უჭერს. თავდაპირველად პაველმა, ისევე, როგორც მოსკოვის პატრიარქმა განაცხადეს, რომ კორონავირუსი ადამიანების ცოდვებით არის გამოწვეული და მისი დამარცხება ჩახუტებით, ლოცვით და მარხვით იქნება შესაძლებელი.
უკრაინის შინაგან საქმეთა მინისტრის მოადგილე, ანტონ გერაშენკომ თქვა, რომ ყველა იმ სასულიერო პირის პასუხისმგებლობის საკითხი დადგება, რომლებმაც, 19 აპრილს, სააღდგომო დღესასწაულზე ეკლესიებში საკარანტინო შეზღუდვები დაარღვიეს.
უკრაინის შინაგან საქმეთა სამინისტროს მონაცემებით, სააღდგომო ღვთისმსახურებას ეკლესიებში 130 000-მდე ადამიანი დაესწრო, 2019 წელს კი ღვთისმსახურებაში მონაწილეობა 7 500 000 ადამიანზე მეტმა მიიღო.
შსს-ის ცნობით, უკრაინის ეკლესიების ნაწილში ღვთისმსახურების რიტუალი კარანტინის რეჟიმის შეზღუდვების დარღვევებით ჩატარდა.
უკრაინის მართლმადიდებელი ეკლესია ერთერთია იმ 12 მსოფლიო მართლმადიდებელ ეკლესიას შორის, რომელმაც ერისკაცებისთვის ღვთისმსახურებაზე დასწრება აკრძალა.
თავდაპირველად უკრაინის ეკლესიამ ერთი კოვზით ზიარების წესი შეცვალა.
ამ დროისთვის უკრაინაში ახალი კორონავირუსის 6,592 დადასტურებული შემთხვევაა აღრიცხული, საიდანაც 174 ადამიანი გარდაიცვალა, 424 კი – გამოჯანმრთელდა.
Loading ...