უკრაინასა და საქართველოს შორის საბორნე მიმოსვლა აღდგა

უკრაინამ საქართველოსთან საბორნე მიმოსვლა აღადგინა. კერძოდ, 2022 წლიდან, ანუ უკრაიანში რუსეთის სრულმასშტაბიანი შეჭრის დაწყების შემდეგ პირველად ოდესის ოლქის ქალაქ ჩერნომორსკის პორტიდან ბათუმის პორტამდე ორი რეისი შესრულდა.

ამის შესახებ უკრაინის რკინიგზის კომერციული საქმიანობისა და ლოგისტიკის მიმართულების დირექტორმა, ტიმოფეი მურახოვსკიმ განაცხადა, რასაც „ინტერფაქს-უკრაინა“ ავრცელებს.

მისი ცნობით, 18 და 26 მარტს ჩერნომორსკის პორტიდან ბათუმის პორტში ორი რეისი შესრულდა, ხოლო მესამე რეისი მომავალ კვირას არის დაგეგმილი.

მურახოვსკი ამბობს, რომ უკრაინა-საქართველოს შორის საბორნე მომსახურება ტრანსკასპიური საერთაშორისო სატრანსპორტო მარშრუტის, ანუ შუა დერეფნის ფარგლებში აღდგა.

პროექტს საზღვაო გადამზიდავი ოდესური კომპანია Ukrferry და უკრაინის რკინიგზის ვარშავაში ბაზირებული შვილობილი კომპანია, UZ Cargo Poland ახორციელებენ.

მურახოვსკი ამბობს, რომ მარტში პირველი რეისები “ინფორმაციული დუმილის” რეჟიმში შესრულდა. მან ბიზნესს უფრო აქტიური ჩართულობისკენ მოუწოდა.

ამასთან, 2 აპრილს ოდესის გამოცემა „დუმსკაიამ“ დაწერა, რომ ჩერნომორსკის პორტსა და ბულგარეთის პორტ ვარნას შორის საბორნე გადასასვლელი ნაწილობრივ აღდგა, რომელიც ჩერნომორსკი-ვარნა-ბათუმის ახალი საბორნე ხაზის ნაწილია. გამოცემის ცნობით, სატვირთო ბორან Vilnius-მა ბულგარეთის პორტში უკვე რამდენიმე რეისი შეასრულა.

სააგენტო Reuters-ის შეფასებით, საქართველოსთან საბორნე მიმოსვლის განახლება კიევს კავკასიისა და ცენტრალური აზიის ბაზრებზე წვდომის საშუალებას მისცემს. სააგენტო წერს, რომ უკრაინამ შავი ზღვის დასავლეთ ნაწილში დერეფანი 2023 წელს მას შემდეგ გახსნა, რაც უკრაინულმა შეიარაღებულმა ძალებმა იქიდან რუსული სამხედრო ხომალდები საზღვაო დრონების თავდასხმებით განდევნეს. ამ დერეფანმა უკრაინას საშუალება მისცა, მარცვლეულისა და ლითონის ექსპორტი გაეზარდა.

კომპანია Ukrferry-მ საქართველოსთან საბორნე მიმოსვლა 2022 წლის თებერვლის შემდეგ შეწყვიტა. 2024 წლის ივნისში კომპანიამ დააანონსა, რომ ჩერნომორსკ-ბათუმის საბორნე ხაზი 9 ივლისიდან აღდგებოდა, ხოლო საქართველოს მიმართულებით პირველი რეისი 12 ივლისს უნდა შესრულებულიყო, თუმცა ეს არ მომხდარა.

ცნობისთვის: თებერვლის ბოლოს უკრაინის რკინიგზამ შუა დერეფნის ფარგლებში ოდესიდან საბორნე მიმოსვლის აღდგენა ფოთის პორტამდეც დააანონსა. კერძოდ, ტვირთის გადასაზიდად უკრაინის რკინიგზა ორ ბორანს, Heroes of Plevna-სა („პლევნის გმირებსა”) და Heroes of Shipka-ს („შიპკის გმირებს“) გამოიყენებს. ბორნები საკონტეინერო მატარებლებს კასპიის პორტებიდან ბაქოში, შემდეგ კი ფოთის პორტიდან ოდესაში გადაიყვანენ, ხოლო ოდესიდან ევროპაში გაემართებიან. ბორნები დღეში, მინიმუმ, ორი საკონტეინერო მატარებლის გადაყვანას შეძლებენ, რაც ჩინეთსა და ევროპას შორის ტვირთბრუნვას მნიშვნელოვნად გაზრდის. ასევე, პროექტის განსახორციელებლად ყაზახეთში კომპანია, UZ Cargo East დარეგისტრირდება. შედეგად უკრაინის რკინიგზა არა მხოლოდ სარკინიგზო, არამედ საზღვაო გადაზიდვების ოპერატორი ხდება.

www.bpn.ge