''უკანასკნელ წვეთამდე ვიბრძოლებთ'' – ლიხაურელებმა კარიერულ წარმოებაზე უარი კიდევ ერთ კომპანიას უთხრეს

სოფელ ლიხაურის მცხოვრებლებმა უარი კარიერულ წარმოებაზე კიდევ ერთ კომპანიას უთხრეს.

”კავკას ცემენტ ჯორჯიას” წარმომადგენელი დღეს ლიხაურელებს შეხვდა და საკუთარი გეგმები გააცნო. გელა დუმბაძის განცხადებით მდინარე აჭისწყლისა და ბჟუჟის შესართავთან კომპანია 105 000 კუბური მეტრი ინერტული მასალის ამოღებას გეგმავს და ამისთვის შესაბამისი ლიცენზიაც აქვს. დუმბაძე ლიხაურელებს სოფლისთვის გვერდით დგომას და დახმარებასაც დაპირდა.

შეხვედრა ხმაურის ფონზე განვითარდა.მოსახლეობის განცხადებით, მდინარიდან ინერტული მასალის ამოღებას არ დაუშვებენ, რადგან მანამდე ახლო წარსულში მოქმედი კარიერების მუშაობის შედეგად მოსახლეობამ დიდი ზარალი განიცადა, ჭებში წყალი დაშრა, თევზი აღარ მოიპოვება და მდინარის კალაპოტი მნიშვნელოვნად შეიცვალა.

მიუხედავად მოსახლეობის პროტესტისა, კომპანიის წარმომადგენელმა განაცხადა, რომ მუშაობას მაინც გააგძელებს რადგან ამის ოფიციალური ნებართვა აქვს, მოსახლეობის განცხადებიტ კი თუ კომპანია სამუშაოებს განაახლებს, სოფელი რადიკალურ საპროტესტო ზომებს მიმართავს.