ევროპის საფეხბურთო კლუბების ასოციაციათა კავშირს, უეფას ევროკომისიიდან მოუწოდეს, გადახედოს ევროპის ჩემპიონატის ფინალური მატჩების ლონდონში ჩატარების გადაწყვეტილებას.
ევროკომისიის ვიცე-პრეზიდენტმა, მარგარიტის სხინასმა მიზეზად დაასახელა დიდ ბრიტანეთში კორონავირუსის „დელტა“ შტამის გავრცელება. ევროკომისიის მაღალჩინოსნის განცხადებით, პირადად მას მიაჩნია, რომ ლონდონის „უემბლის“ სტადიონზე დაგეგმილი მატჩები სხვაგან უნდა გაიმართოს. სხინასმა უეფას მიმართა, ვითარება დეტალურად გააანალიზოს და გადაწყვეტილება ფაქტებზე დაყრდნობით მიიღოს.
6 და 7 ივლისს, „უემბლის“ სტადიონზე უნდა ჩატარდეს ევროპის ჩემპიონატის ნახევარფინალის შეხვედრები, ხოლო 11 ივლისს ფინალური მატჩი. 90 ათას მაყურებელზე გათვლილ სტადიონზე 60 ათასი გულშემატკივარი დაიშვება.
დიდ ბრიტანეთში კორონავირუსით ინფიცირების ახალი შემთხვევების დაახლოებით 95% „დელტა“ ვარიანტზე მოდის. პირველად ინდოეთში აღმოჩენილი ეს შტამი უფრო გადამდები და მძიმეა, ვიდრე თავდაპირველი ვარიანტი SARS-CoV-2, ან პირველად ბრიტანეთში გამოვლენილი შტამი „ალფა“.
www.radiotavisupleba.ge
Loading ...
