ტრამპი მასობრივი დეპორტაციისთვის საგანგებო მდგომარეობის გამოცხადებას გეგმავს

აშშ-ს არჩეულმა პრეზიდენტმა დონალდ ტრამპმა 18 ნოემბერს დაადასტურა, რომ ქვეყანაში არალეგალურად მცხოვრები მიგრანტების მასობრივი დეპორტაციებისთვის ქვეყანაში საგანგებო მდგომარეობას გამოაცხადებს და სამხედროებს გამოიყენებს.

ტრამპი საკუთარ სოციალურ პლატფორმა Truth Social-ზე არაკომერციული ორგანიზაცია Judicial Watch-ის პრეზიდენტის ტომ ფიტონის პოსტს გამოეხმაურა, რომელშიც ის წერდა, რომ გავრცელებული ცნობებით, მომავალი ადმინისტრაცია არალეგალი მიგრანტების დეპორტაციის მიზნით საგანგებო მდგომარეობის გამოცხადებისა და “სამხედრო საშუალებების” გამოყენებისთვის ემზადება.

“ეს სიმართლეა”. – დაწერა ტრამპმა ფიტონის პოსტთან დაკავშირებით.

წინასაარჩევნო პერიოდში ტრამპმა ამომრჩევლებს პირობა მისცა, რომ პრეზიდენტის თანამდებობის დაკავების შემთხვევაში, არალეგალი მიგრანტების მასობრივ დეპორტაციას დაიწყებს.

“პირველივე დღეს მე წამოვიწყებ ყველაზე მასშტაბურ დეპორტაციის პროგრამას ამერიკის ისტორიაში, რათა დამნაშავეები გავყაროთ. მე გადავარჩენ ყველა ქალაქსა და დასახლებას, რომლებშიც შეიჭრნენ და დაიპყრეს, და ჩვენ ამ სასტიკ და სისხლისმსმელ კრიმინალებს ციხეში ჩავსვამთ, შემდეგ კი ჩვენი ქვეყნიდან გავყრით, რაც შეიძლება სწრაფად”. – განაცხადა ტრამპმა წინასაარჩევნო პერიოდის ბოლო დღეებში ყრილობაზე.

ამ დაპირების შესასრულებლად ტრამპმა მნიშვნელოვან თანამდებობებზე უკვე დაასახელა ისეთი კანდიდატები, რომლებიც იმიგრაციის მხრივ “მკაცრი ხაზის” პოლიტიკის გატარებას ემხრობიან.

სასაზღვრო კონტროლზე პასუხისმგებლად ტრამპმა სასაზღვრო კონტროლს ზედამხედველობას იმიგრაციისა და საბაჟო აღსრულების (ICE) ყოფილი უფროსი, ტომ ჰომანი, დაასახელა.

ტრამპის მიერ შერქმეული ე.წ. “საზღვრის მეფის” თანამდებობაზე, რომელსაც სენატის თანხმობა არ სჭირდება, ჰომანი აშშ-ს სამხრეთ და ჩრდილოეთ საზღვრებზე იქნება პასუხისმგებელი, ისევე როგორც “ყველა სახის საზღვაო და საავიაციო უსაფრთხოებაზე”.

ჰომანი ხშირად აქებდა ტრამპს და ამბობდა, რომ საზღვრის უსაფრთხოებისთვის ტრამპმა ყველაზე მეტი გააკეთა. ჰომანის თქმით, როდესაც ტრამპი იანვარში პრეზიდენტის პოსტზე დაბრუნდება, იგი “უხელმძღვანელებს დეპორტაციის ყველაზე დიდ ოპერაციას, რომელიც ქვეყანას ოდესმე უნახავს”.

ხოლო ეროვნული უსაფრთხოების მინისტრად, რაც ამ დაპირების შესასრულებლად კიდევ ერთი მნიშვნელოვანი თანამდებობაა, ტრამპმა კრისტი ნოემი შეარჩია.