აშშ-ის პრეზიდენტი დონალდ ტრამპი მინეაპოლისში ჩატარებულ ოპერაციას გამოეხმაურა. მისი თქმით, საიმიგრაციო და საბაჟო სამსახურის (ICE-ის) აგენტმა გასროლა თავდაცვის მიზნით განახორციელა.
„ახლახან ვნახე მინეაპოლისში, მინესოტაში მომხდარი ინციდენტის ამსახველი ვიდეოჩანაწერი. ამის ყურება საშინელებაა. ქალი, რომელიც ყვიროდა, აშკარად პროფესიონალი აგიტატორი იყო, ხოლო ქალი, რომელიც მანქანას მართავდა, უწესრიგოდ მოქმედებდა, ხელს უშლიდა და ეწინააღმდეგებოდა, შემდეგ კი განზრახ, ძალადობრივად და სასტიკად გადაუარა ICE-ის ოფიცერს, რომელმაც, როგორც ჩანს, მას თავდაცვის მიზნით ესროლა.
თანდართული ვიდეოჩანაწერის მიხედვით, ძნელი დასაჯერებელია, რომ ის (ოფიცერი) ცოცხალია, მაგრამ ახლა საავადმყოფოში გამოჯანმრთელებას ცდილობს. ვითარება სრულყოფილად შესწავლის პროცესშია. ამ ინციდენტების მიზეზი ის არის, რომ რადიკალური მემარცხენეები ყოველდღიურად ემუქრებიან და თავს ესხმიან ჩვენს სამართალდამცველებსა და საიმიგრაციო სამსახურის აგენტებს. ისინი ცდილობენ, თავიანთი საქმე აკეთონ – ამერიკა უსაფრთხო გახადონ“, – წერს დონალდ ტრამპი Truth Social-ზე.
როგორც აშშ-ის პრეზიდენტი აღნიშნავს, ქვეყანა სამართალდამცველების გვერდით უნდა დადგეს და დაიცვას ისინი იმ რადიკალური მემარცხენე მოძრაობისგან, რომელიც ძალადობასა და სიძულვილს აღვივებს.
შეგახსენებთ, მინეაპოლისში ჩატარებული ოპერაციის დროს საიმიგრაციო და საბაჟო სამსახურის (ICE) აგენტმა ავტომობილში მყოფ ქალს ესროლა და მოკლა. ამის შესახებ ინფორმაციას „სიენენი“ ავრცელებს.
მედიის ინფორმაციით, სროლა იმ ფონზე მოხდა, როდესაც მინესოტის შტატი აშშ-ის პრეზიდენტის, დონალდ ტრამპის ადმინისტრაციის მიერ მთელი ქვეყნის მასშტაბით განხორციელებული სააღსრულებლო ღონისძიების გამო იმიგრაციის წინააღმდეგ რეპრესიების წინაშე დგას.
„სიენენი“ ორ წყაროზე დაყრდნობით იუწყება, რომ მინეაპოლისში დაახლოებით ორი ათასი ფედერალური აგენტი გაიგზავნა.
Loading ...