ოზურგეთის რაიონულმა სასამართლომ ”ნაციონალური მოძრაობის” სარჩელი, ”ქართული ოცნების” ოზურგეთის მერობის კანდიდატის ავთანდილ თალაკვაძისა და სოფელ ძიმითის მაჟორიტარი დეპუტატობის კანდიდატის ტიტე მგელაძის კანდიდატურები მოხსნილიყო, არ დააკმაყოფილა.
”ნაციონალური მოძრაობა” მიიჩნევდა, რომ ტიტე მგელაძემ ამომრჩეველი მოისყიდა და საარჩევნო ხმების სანაცვლოდ სოფლის მოსახლეობას წყლის რეზერვუარები შეუძინა. აღნიშნულ ფაქტს ტიტე მგელაძე ”ტვ პირველთან” ინტერვიუში თავად ადასტურებდა და ამბობდა, რომ წყლის რეზერვუარები სოფელს ესაჭიროებოდა, ამიტომაც საკუთარი ფულით შეიძინა და ამას ამომრჩევლის მოსყიდვად სულაც არ მიიჩნევდა.
სასამართლო პროცესზე ”ქართული ოცნების” წარმომადგენლებმა განაცხადეს, რომ ამომრჩევლის მოსყიდვის თვალსაჩინო მტკიცებულება მოსარჩელე მხარემ ვერ წარმოადგინა, რაც შეეხება თავად ტიტე მგელაძესთან ინტერვიუს, აღნიშნული ინტერვიუ მისმა წარმომადგენელმა ტრაბახად მიიჩნია და მოსამართლეს ერთგვარად მიანიშნა კიდეც, რომ მგელაძესთან ინტერვიუ სერიოზულად განსახილველი არ იყო.
”როგორც ჩანს, მე უკეთესი წარმოდგენა მაქვს ტიტე მგელაძეზე, ვიდრე თქვენ. ის შეიძლება კარგი პოლიტიკოსი ვერ იყოს, მაგრამ პატივცემული და კარგი ექიმია, თუმცა თქვენ კი მას ფაქტიურად ტრაბახას უწოდებთ და ამით შეურაცხყოფას აყენებთ თავად ტიტე მგელაძეს და სასამართლოს” – განაცხადა ”ერთიანი ნაციონალური მოძრაობის” წარმოამდგენელმა დავით მჟავანაძემ.მჟავანაძემ მოსამართლეს პრეცედენტული გადაწყვეტილების გამოტანა სთხოვა, რათა, მისი თქმით, ქვეყანაში ერთხელ და სამუდამოდ დასრულდეს ამომრჩევლის მოსყიდვის ფაქტები.
საბოლოოდ, სამსაათიანი სხდომის შემდეგ მოსამართლემ ერთი საათით შესვენება გამოაცხადა და სასამართლო დარბაზში ხელმეორედ შეკრებილ მხარეებს გადაწყვეტილება გამოუცხადა. გადაწყვეტილების მიხედვით, მან ”ნაციონალური მოძრაობის” სარჩელის დაკმაყოფილება მიზანშეწონილად არ მიიჩნია.
მოსარჩელე მხარე მიიჩნევს, რომ სასამართლომ ”ქართული ოცნების” დაკვეთა შეასრულა და მიუხედავად იმისა, რომ კანდიდატი სატელევიზიო სიუჟეტში თავად ადასტურებდა ფაქტს, გადაწყვეტილება მაინც მმართველი პარტიის სასარგებლოდ გამოიტანა.,,ქართული ოცნების” წარმომადგენელის თქმით, რომელიც პროცესს ესწრებოდა, სასამართლოს გადაწყვეტილება საფუძვლიანი იყო და მოსარჩელე მხარეს საკმარისი მტკიცებულებები საკუთარი სარჩელის დაკმაყოფილებისთვის არ ჰქონდა.
ნათია ბოკუჩავა – ავთანდილ თალაკვაძისა და ტიტე მგელაძის წარმომადგენელი:
”გადაწყვეტილება სამართლიანი და დასაბუთებულია. ”ქართული ოცნების” მხრიდან საარჩევნო კოდექსის დარღვევას ადგილი არ ჰქონია. მგელაძის მხრიდან ავზის შესყიდვის და ამომრჩევლებისთვსი გადაცემის დამადასტურებელი მტკიცებულება ბუნებაში არ არსებობს”
გადაწყვეტილების გამოტანის შემდეგ მერობის კანდიდატი ირაკლი ღლონტი მოსამართლესთან შეხვედრას მოითხოვდა, თუმცა მანდატურებმა ამის უფლება არ მისცეს, რასაც ხმაური მოჰყვა. ირაკლი ღლონტის თქმით, დღევანდელი სხდომის მოსამართლე ზონდერია, რომელსაც აღნიშნული გადაწყვეტილება არ ეპატიება.
”ნაციონალური მოძრაობა” გადაწყვეტილების გასაჩივრებას გეგმავს.
კომენტარები
Loading ...