ტექნიკური უნივერსიტეტის 4 თანამშრომელს ახალი კორონავირუსი დაუდასტურდა, მათი მდგომარეობა სტაბილურია. ამის შესახებ ინფრომაცია ტაბულას უნივერსიტეტის საზოგადოებრივი ურთიერთობის სამსახურში დაუდასტურეს.
მათი ცნობით, ინფიცირებული თანამშრომლები დისტანციურად მუშაობდნენ, შესაბამისად უნივერსიტეტის სხვა თანამშრომლებთან შეხება არ ჰქონიათ.
ბოლო კვირის განმავლობაში ქვეყანაში ახალი კორონავირუსის შემთხვევების გამოვლენა მკვეთრად გაიზარდა. დღეს, 18 სექტემბერს, კორონავირუსის 182 ახალი შემთხვევა დადასტურდა, აქედან 129 აჭარაში გამოვლინდა.
უწყებათაშორისი საკოორდინაციო საბჭოს გადაწყვეტილებით, საქართველოს ყველა დიდ ქალაქში სასწავლო პროცესი 1-ელ ოქტომბრამდე გადაიდო. აკრძალულია 200 ადამიანზე მეტის შეკრება, როგორც დახურულ, ისე ღია სივრცეებშიც. ასევე აკრძალულია ქორწილებისა და ქელეხების გადახდა.
სულ ქვეყანაში გამოვლენილია ახალი კორონავირუსის 3 119 შემთხვევა, საიდანაც გამოჯანმრთელდა 1 435 პაციენტი და გარდაიცვალა – 19.
Loading ...
