სწავლისა და დასაქმების შესაძლებლობა – ”გურიაTV” ახალ პროექტს იწყებს

‘’განათლებული, პროფესიონალი კადრები რეგიონული მედიის გაძლიერებისთვის’’ – ასე ქვია ახალ პროექტს, რომლის განხორციელებაც ‘’გურიაTV’’ – მ უკვე დაიწყო.

პროექტი, რომელიც საქართველოში აშშ-ს საელჩოს დემოკრატიის კომისიის მცირე გრანტების პროგრამის ფარგლებში დაფინანსდა, მიზნად ადგილობრივი მედია ბაზრისთვის კვალიფიციური კადრების, ძირითადად რეპორტიორების მომზადებას ისახავს, რითაც ერთი მხრივ, რეგიონული მედია-საშუალებები ახალი კადრებით გაძლიერდებიან, მეორე მხრივ კი რეგიონში მცხოვრებ ახალგაზრდებს ახალი პროფესიის შეძენის და დასაქმების რეალური პერსპექტივა გაუჩნდებათ.

პროექტი გულისხმობს, როგორც თეორიულ ასევე პრაქტიკულ სწავლებას. თეორიული ნაწილისთვის პროექტის პარტნიორის ოზურგეთის კოლეჯ ‘’ჰორიზონტის’’ ბაზაზე უკვე შექმნის პროცესშია სპეციალური საგანმანათლებლო პროგრამა, რომელიც ახალგაზრდებისთვის თეორიული ცოდნისთვის სრულყოფილ მომზადებას გულისხმობს.

რეპორტიორის პროფესიის პრაქტიკულ ნაწილს ახალგაზრდები  გურიაTV-ს სტუდიებში, აქ დასაქმებული ჟურნალისტების დახმარებით დაეუფლებიან. მომზადდება როგორც რეპორტაჟები, ასევე სატელევიზიო პროგრამები და ფილმები.

დაეუფლო ახალ პროფესიას,გახდე მოთხოვნადი დასაქმების ბაზარზე და სამსახურის დაწყების რეალური შესაძლებლობა გამოგიჩნდეს – ამ შესაძლებლობას ‘’გურიაTV’’ ყველა აქტიურ  ახალგაზრდას სთავაზობს, რომლებიც ოზურგეთსა და ფოთში ცხოვრობენ და რეალური დასაქმებისთვის საჭირო მოტივაცია აქვთ.

მასალა მომზადებულია პროექტის “განათლებული, პროფესიონალი კადრები რეგიონული მედიის გაძლიერებისთვის” ფარგლებში.