სახელმწიფო უსაფრთხოების სამსახურის (სუს) ხელმძღვანელის თანამდებობას მამუკა მდინარაძე დაიკავებს, – ამის შესახებ პრემიერ-მინისტრმა, ირაკლი კობახიძემ განაცხადა მთავრობის კანცელარიაში.
მდინარაძე აღნიშნულ თანამდებობაზე შეცვლის ანრი ოხანაშვილს, რომელმაც სუს-ის ხელმძღვანელის პოსტი ცოტა ხნის წინ დატოვა. ამასთან, ანრი ოხანაშვილი ეროვნული უსაფრთხოების საკითხებში საქართველოს პრემიერ-მინისტრის მრჩევლის თანამდებობას დაიკავებს.
ოხანაშვილის სახელით გამოქვეყნებული განცხადება სოციალური ქსელით სუს-მა გაავრცელა.
„მსურს, ვაცნობო საზოგადოებას, რომ მმართველ გუნდთან კონსულტაციის საფუძველზე, მივიღე გადაწყვეტილება საქართველოს სახელმწიფო უსაფრთხოების სამსახურის უფროსის თანამდებობის დატოვებისა და ეროვნული უსაფრთხოების საკითხებში საქართველოს პრემიერ-მინისტრის მრჩევლის თანამდებობის დაკავების შესახებ. <…> მსურს, მადლობა გადავუხადო მმართველ გუნდს მთელი ამ ხნის განმავლობაში გამოცხადებული ნდობისა და მხარდაჭერისთვის. განსაკუთრებული მადლიერება მსურს გამოვხატო ბატონი ბიძინა ივანიშვილის მიმართ პოლიტიკურ საქმიანობაში ჩემდამი გამოცხადებული დიდი ნდობისა და მუდმივი გულშემატკივრობისთვის”, – ნათქვამია ანრი ოხანაშვილის მიერ გავრცელებულ განცხადებაში.
Loading ...