
სუს-ის ახალ უფროსს ანრი ოხანაშვილს ახალი მოადგილეები ეყოლება. ყოფილი ხელმძღვანელის, გრიგოლ ლილუაშვილის მოადგილეები ალექსი ბატიაშვილი, შენგელი ფიცხელაური, გიგა ნიკოლეიშვილი და ლევან ახობაძე კი, როგორც ჩანს, თანამდებობებს ტოვებენ. მათ ნაცვლად ანრი ოხანაშვილმა დღეს, სუს-ში თანამშრომლების წინაშე ოფიციალურად წარდგომისას სამი ახალი მოადგილე ახსენა. ესენია: ირაკლი ბერაია, გელა გელაძე და ლევან ხარანაული.
“ყველაფერს გავაკეთებ, რომ ეს განსაკუთრებული ნდობა, რომელიც პრემიერ-მინისტრმა გამომიცხადა, უმაღლეს დონეზე გავამართლო. გავამართლო ჩემს მოადგილეებთან ერთად. ირაკლი ბერაია, რომელიც პირველ მოადგილედ არის დანიშნული, გელა გელაძესა და ლევან ხარანაულთან ერთად”, – განაცხადა ოხანაშვილმა.
აღსანიშნავია, რომ სახელმწიფო უსაფრთხოების სამსახურში Bm.ge-ის დაუდასტურეს, რომ ანრი ოხანაშვილის მოადგილეებად წარდგენილია დაზვერვის სამსახურის ყოფილი უფროსი და ასევე პარლამენტის თავდაცვის კომიტეტის ყოფილი თავმჯდომარე ირაკლი ბერაია, ასევე გელა გელაძე, რომელიც თავდაცვის მინისტრის მოადგილის პოსტს იკავებდა ბოლო რამდენიმე თვის განმავლობაში და ლევან ხარანაული, რომელიც იუსტიციის მინისტრობის პერიოდში იყო ოხანაშვილის მოადგილე.
ცნობისთვის, ანრი ოხანაშვილი ამ დრომდე იუსტიციის მინისტრის პოსტს მხოლოდ რამდენიმე თვით იკავებდა. მანამდე ის იყო “ოცნების” წევრი დეპუტატი პარლამენტში. სუს-ის ხელმძღვანელობა კი გრიგოლ ლილუაშვილს ჰქონდა ჩაბარებული, რომელიც ამ თანამდებობიდან გათავისუფლების შემდეგ, “ოცნების” თავდაპირველი გეგმით, ახალშექმნილ რეგიონული განვითარების სამინისტროს უნდა ჩასდგომოდა სათავეში, თუმცა გუშინ ცნობილი გახდა, რომ ლილუაშვილი ამ პოსტზე აღარ დაინიშნება. კობახიძემ მიზეზად “განსხვავებული მოსაზრებები” დაასახელა.