სახელმწიფო უსაფრთხოების სამსახური ადასტურებს მმართველი პარტიის წევრის, მამუკა მდინარაძის ინფორმაციას, რომ გამოჰკითხეს ყოფილი მთავარი პროკურორი ოთარ ფარცხალაძე. რადიო თავისუფლებას უწყების პრესსამსახურში უთხრეს, რომ სხვა ინფორმაციას არ ფლობენ.
“გამახსენეთ, თუ შეიძლება, მტკიცებულება რა იყო მისი ბრალდების დამადასტურებელი და აუცილებლად ავდგები და მეც ვიკითხავ, როგორც პარლამენტის წევრი, ჩემი უფლებამოსილების ფარგლებში იმ მტკიცებულებასთან დაკავშირებით, თუ რატომ არ იბარებენ.
თუ არაფერია და ცარიელი ფურცელია, შეიძლება კითხვაც კი რა უნდა დაუსვა, არ არსებობდეს პოზიცია საგამოძიებო უწყებაში. სამწუხაროდ, ჩვენ არ მიგვიღია არცერთი ფრაზა, არათუ მტკიცებულება ბრალდების დამდასტურებელი. თქვენ რომ იყოთ გამომძიებელი, აგენტი ხომ არ ხართო, ეს უნდა ჰკითხოთ კაცს?!” – უთხრა ჟურნალისტებს დეპუტატმა მამუკა მდინარაძემ. მოგვიანებით კი დააზუსტა, რომ ფარცხალაძე საგამოძიებო უწყებაში იმყოფებოდა.
14 სექტემბერს ცნობილი გახდა, რომ აშშ-ის სახელმწიფო დეპარტამენტის დოკუმენტის მიხედვით, საქართველოს ყოფილ მთავარ პროკურორს, ოთარ ფარცხალაძეს, სანქციები დაუწესდა საქართველოზე რუსეთის მანკიერი ზეგავლენის საპასუხოდ.
აშშ-ის მიერ დაწესებული სანქციების გამო საქართველოს ყოფილ მთავარ პროკურორს, ოთარ ფარცხალაძეს, “აქტივებზე წვდომა და ფინანსური ტრანზაქციების შესრულება” შეეზღუდა და იგივე წესები გავრცელდა საქართველოს საბანკო სექტორზეც.
Loading ...