სტრელკოვი პუტინის წინააღმდეგ

რუსი ულტრანაციონალისტი იგორ ვსევოლოდის-ძე გირკინი, იგივე სტრელკოვი, აცხადებს, რომ იგი პუტინზე უკეთესი პრეზიდენტი იქნებოდა და პუტინს ზედმეტად მიმნდობს უწოდებს.

მან ტელეგრამზე განცხადება გაავრცელა, სადაც ჩამოთვალა 6 მიზეზი, თუ რატომ იქნება პუტინზე უკეთესი პრეზიდენტი. 52 წლის FSB-ს ყოფილი  ოფიცრის  პოსტი ირონიულია და რა თქმა უნდა, იგი პრეზიდენტობისთვის ბრძოლას ვერ შეძლებს (რუსული კანონმდებლობით, სისხლის სამართლის დანაშაულისთვის გასამართლებულ პირს პრეზიდენტობის კანდიდატობა არ შეუძლია).

გირკინმა სახელი გაითქვა 2014 წელს მალაიზიური თვითმფრინავის ჩამოგდებით, რის შემდეგაც 298 მგზავრი დაიღუპა. ჰოლანდიურმა სასამართლომ მას დაუსწრებლად სამუდამო პატიმრობა მიუსაჯა. 2014 წელს იგი მონაწილეობდა უკრაინის წინააღმდეგ დაწყებულ ომში, როცა მისმა ნახევრადსამხედრო დაჯგუფებამ სლავიანსკი აიღო. მალე გირკინი თვითგამოცხადებული დონეცკის სახალხო რესპუბლიკის თავდაცვის მინისტრი გახდა.

ტერორისტს, რომელიც ტერორიზმის გამო დასავლეთში იძებნება, ის ხელისუფლებაც ტერორიზმის წახალისების ბრალდებით გაასამართლებს, ვისაც ერთ დროს ის ემსახურებოდა. გირკინს ხუთი წლით თავისუფლების აღკვეთა ემუქრება.

გირკინმა 2024 წლის გაზაფხულზეც გამოთქვა პრეზიდენტობის სურვილი ქვეყანაში სისტემური კრიზისის გამო, ამბობდა, რომ მას მხარს უჭერდა ნაციონალისტური ჯგუფი და თვითონ უკეთესი სამხედრო სტრატეგი იყო, ვიდრე პუტინი. მას არ აქვს კავშირები და მაშასადამე, არავითარი ვალდებულება რუს ოლიგარქებთან და არასდროს სწამდა დასავლეთის, განსხვავებით ვოვასგან, ასეთია მისი ლოგიკა. გირკინი პირობას დებდა, რომ აღმოფხვრიდა რუსული  თავდაცვის სისტემაში კორუფციას, რაც უკრაინის ომში მთავარი დამაბრკოლებელია. არ აღიარებს უკრაინის სუვერენიტეტს.

აღმოჩნდა, რომ რუსეთი მზად არ იყო ომისთვის. რუსული არმია გაიჭედა და არაკომპეტენტურობით გვაოცებს. მე ისეთივე ჯანმრთელი და ათლეტური არ ვარ, როგორიც პუტინი იყო ჩემს ასაკში და ფიზიკურად ვერ შეგაწყენთ თავს 20 წელზე მეტი ხანი ხელისუფლების სათავეში ყოფნით – დაახლოებით ასეთი შინაარსის გამოტანა შეიძლება მისი ნაწერიდან.

პუტინის პრეს-მდივნის, პესკოვის მიხედვით, გირკინის სიტყვები არასწორად იქნა გაგებული, ასევე, პუტინს უპრეცენდენტო მხარდაჭერა ექნება, თუკი კენჭისყრას გადაწყვეტს.

Photo: Denis Kornilov / Shutterstock

ავტორი: ლაშა ჩხაიძე.

მასალა მომზადებულია politico-ს, reuters-ის და neweasterneurope-ის სტატიებზე დაყრდნობით.