სპუტნიკი: “ობიექტივი” რუსულ მაუწყებლობაზე უარს არ იტყვის

ტელეკომპანია “ობიექტივის” მენეჯერმა, ზვიად ავალიანმა “სპუტნიკ-საქართველოსთან” ინტერვიუში თქვა, რომ არხი რუსულ ენაზე აფხაზი და ოსი მოსახლეობისთვის მაუწყებლობს და ამას მომავალშიც გააგრძელებს, მიუხედავად იმ სანქციებისა, რომელიც ტელეარხს რუსულად მაუწყებლობის გამო კომუნიკაციების მარეგულირებელმა კომისიამ დააკისრა. 10 იანვრის ინტერვიუში ავალიანი ამბობს, რომ საახალწლო პერიოდთან დაკავშირებით ახლა პოლიტიკური გადაცემები არხზე თითქმის არ გადის, მაგრამ მათი აღდგენის შემდეგ რუსულენოვანი გადაცემებიც აღდგება.

მედიის განვითარების ფონდმა კომუნიკაციების მარეგულირებელ კომისიას ობიექტივის ეთერში რუსულენოვანი გადაცემების შესახებ საჩივრით 2019 წლის დეკემბერში მიმართა. 9 იანვარს მარეგულირებელმა კომისიამ არხი გააფრთხილა და რუსულენოვანი გადაცემების ბადიდან დაუყოვნებლივ ამოღება დაავალდებულა.

მაუწყებლობის შესახებ კანონის 381 მუხლის თანახმად, საქართველოში ავტორიზებულმა საერთო ეროვნული მაუწყებლობის განმახორციელებელმა ტელემაუწყებელმა სამაუწყებლო ბადეში პროგრამები საქართველოს სახელმწიფო ენაზე უნდა განათავსოს. საქართველოს სახელმწიფო ენა საქართველოს კონსტიტუციის თანახმად, არის ქართული, ხოლო აფხაზეთის ავტონომიურ რესპუბლიკაში − აგრეთვე აფხაზური.

მედიის განვითარების ფონდი აქცენტს აკეთებს იმაზე, რომ “ობიექტივის” მენეჯერი ზვიად ავალიანი, ამავდროულად მარეგულირებელი კომისიის ახალი პლატფორმის “მედიაკრიტიკა” ავტორია. ზვიად ავალიანს “მედიაკრიტიკაზე” 2019 წლის 5 ნოემბერს გამოქვეყნებული აქვს რეცენზია, სათაურით “რას ნიშნავს პრორუსული მედია?”, რომელშიც ავტორი საქართველოში რუსულ პროპაგანდასთან ბრძოლას “კუდიანებზე ნადირობას” ადარებს, რომლის მიზანიც განსხვავებული სარედაქციო პოლიტიკის მქონე მედია საშუალებების მარგინალიზაციაა.

კომუნიკაციების მარეგულირებელი კომისიის მიერ შექმნილი მედია კრიტიკის პლატფორმა 2019 წლის მიწურულს აამოქმედა. ​ ამ პლატფორმაზე ზვიად ავალიანს სამი ბლოგი აქვს გამოქვეყნებული. მათგან ერთი მედია კრიტიკის საჭიროებას ეხება, მეორე კი “მთავარი არხის” სარედაქციო პოლიტიკას განიხილავს.

მითების დეტექტორი მომხმარებელს ახსენებს იმასაც, რომ “ზვიად ავალიანს “ობიექტივის” ეთერში არაერთხელ გაუჟღერებია ისეთი გზავნილები, რომლებიც NATO-ს მიმართ სკეპტიციზმის გაღვივებას ემსახურება. ავალიანი იმეორებს “პატრიოტთა ალიანსის” დღის წესრიგს სამხედრო მიუმხრმლობის შესახებ. “

www.radiotavisupleba.ge