სოხუმი ადასტურებს მოზარდის გარდაცვალებას – კორონავირუსზე ანალიზის პასუხს ელოდებიან

კორონავირუსთან დაკავშირებით აფხაზეთში შექმნილი ოპერატიულ შტაბში დაადასტურეს 2005 წელს დაბადებული მოზარდის გარდაცვალების ფაქტი. გავრცელებულ ინფორმაციაში აღნიშნულია, რომ მას კორონავირუსზე ანალიზი უკვე აუღეს და პასუხს ელოდებიან.
შტაბისვე ცნობით, სოხუმის რესპუბლიკურ საავადმყოფოს რეანიმაციულ განყოფილებაში პაციენტი 8 აპრილის ღამით, უმძიმეს მდგომარებაში მოათავსეს, თუმცა სამედიცინო დამხარების მიუხედავად, ის გარდაიცვალა.
განცხადებაში აღნიშნულია ისიც, რომ მოზარდი ბავშვთა საავადმყოფოში სამ აპრილს გადაიყვანეს ნაწლავური ინფექციის წინასწარი დიაგნოზით. 5 აპრილს პაციენტის მდგომარება გაუმჯობესდა და ის ადგილობრივი პედიატრის მეთვალყურეობის ქვეშ, ამბულოტორიულად მკურნალობისთვის გაწერეს.
“პაციენტს ბავშვობიდან სხვადასხვა ქრონიკული დაავადება აღენიშნებოდა. ხანგრძლივი დროის განმავლობაში წოლითი რეჟიმი ჰქონდა. არსებული ეპიდსიტუაციის გათვალისწინებით, გარდაცვლილს კორონავურუსზე ანალიზები აუღეს”, – ვკითხულობთ შტაბის განცხადებაში.
მანამდე გავრცელდა ინფორმაცია, რომ მოზარდი პნევმონიით გარდაიცვალა.
სოხუმმა გუშინ, 7 აპრილს დაადასტურა კორონავირუსის პირველი შემთხვევა. პაციენტი აფხაზეთში რუსეთიდან დაბრუნდა. დე ფაქტო რესპუბლიკამ რუსეთთან საზღვარი უკვე ჩაკეტა.
უფრო ადრე, გალის სოფელ საბერიოდან ზუგდიდში გადმოყვანილ ქალს, კორონავირუსი საქართველოს კონტროლირებად ტერიტორიაზე დაუდასტურდა.
კორონავირუსის გავრცელების საფრთხის გამო 28 მარტს აფხაზეთში “საგანგებო მდგომარეობა” გამოაცხადა.
აფხაზეთ-სამეგრელოს საოკუპაციო ხაზზე მიმოსვლა კი გაცილებით ადრე, 14 მარტს ჩაკეტა.

წყარო: www.livepress.ge