სოციალური მომსახურების სააგენტოს გაფიცვას ოზურგეთის თანამშრომელთა ნაწილი შეუერთდა

ოზურგეთის სოციალური მომსახურების სააგენტოს თანამშრომელთა ნაწილი დღეს ქვეყნის მასშტაბით გაფიცულ კოლეგებს შეუერთდნენ და ჯანდაცვის სამინისტროსგან სამუშაო პირობების გაუმჯობესებასა და ხელფასების მატებას ითხოვენ. როგორც ოზურგეთის სოციალური სააგენტოს ხელმძღვანელმა თეა ლომჯარიამ  გვითხრა, მიუხედავად ნაწილი თანამშრომლების გაფიცვისა, სამსახური შეუფერხებლად მუშაობს და ისინი მოქალაქეებს ემსახურებიან. რაც შეეხება გაფიცულ თანამშრომლებს, როგორც ლომჯარიამ გვითხრა მათ სამინისტროსგან ახალი საშტატო განრიგი მიიღეს, რომელიც 40 % – დან 60 % – 70 % ხელფასების მატებას ითვალისწინებს. ლომჯარია იმედოვნებს, რომ სააგენტოს თანამშრომლები სამინისტროს შეთავაზებაზე დაფიქრდებიან და სამუშაო პროცესსა და სამსახურს დაუბრუნდებიან.