“სოცდაუცველების დასაქმების პროგრამა”, სავარაუდოდ, აღარ გაგრძელდება

ირაკლი ღარიბაშვილის პრემიერობის დროს, 2022 წელს დაწყებული საზოგადოებრივი სამუშაოების 4-წლიანი პროგრამა, რომელიც სხვადასხვა ადმინისტრაციულ ორგანოში სოცდაუცველების დასაქმებას ითვალისწინებდა, სავარაუდოდ, აღარ გაგრძელდება.

საქმე ის არის, რომ 2026 წლის სახელმწიფო ბიუჯეტის საბოლოო, მესამე ვარიანტში აღნიშნული პროგრამის ბიუჯეტი 21 მლნ 613 000 ლარამდეა შემცირებული, მაშინ როდესაც მეორე ვარიანტში 113 მლნ 300 000 ლარი იყო განსაზღვრული, ხოლო წლევანდელ ბიუჯეტში „სოცდაუცველების დასაქმების პროგრამის“ დაფინანსება 112 მლნ 805 ათასი ლარი იყო.

„პროგრამას მიმდინარე წელს შეუსრულდა 4-წლიანი ციკლი, რაც თავდაპირველად იყო დაგეგმილი.ამავდროულად, ბოლო წლების მაღალი ეკონომიკური ზრდის პარალელურად ფიქსირდება სამუშაო ძალის დეფიციტი შრომის ბაზარზე. შესაბამისად, მიზანშეწონილად ჩაითვალა მომდევნო პერიოდში აღარ გაგრძელდეს პროგრამა არსებული სტრუქტურით და მის ბენეფიციარებს სხვადასხვა გადამზადების პროგრამებით ხელი შეეწყოს კერძო სექტორში დასაქმების მიმართულებით“, – წერია მომავალი წლის მთავარი ფინანსური დოკუმენტის განმარტებით ბარათში.

BMG-ის ჯანდაცვის სამინისტროშიც დაუდასტურეს, რომ „სოცდაუცველების დასაქმების პროგრამა“ არსებული ფორმით არ გაგრძელდება, მაგრამ როგორ სახეს მიიღებს, ჯერჯერობით, უცნობია.

აღსანიშნავია, რომ 2022 წელს, პრემიერ ირაკლი ღარიბაშვილის ინიციატივით შექმნილი პროგრამისთვის ბოლო ოთხ წელიწადში ასეულობით მილიონი ლარია დახარჯული, მაგრამ პროგრამის ეფექტიანობის შესახებ ინფორმაციის არ ვფლობთ.

2025 წელს სოცდაუცველების დასაქმების 300-ლარიანი პროგრამის ბიუჯეტი 112.8 მლნ ლარი იყო, 2024 წელს – 109 მლნ ლარი, 2023 წელს – 107,3 მლნ, 2022 წელს კი 48.1 მლნ იყო.

სოციალური მომსახურების სააგენტოს ინფორმაციით, პროგრამის ამოქმედებიდან 2024 წლის ჩათვლით, ჯამში, სახელმწიფოს 39 707 სოციალურად დაუცველი ჰყავს დასაქმებული. ამ დროისთვის, ქვეყანაში საარსებო შემწეობის მიმღები სოციალურად დაუცველთა რაოდენობა 700 000 ადამიანს აღემატება.

ცნობისთვის: სახელმწიფო ბიუჯეტის პრიორიტეტებისა და პროგრამების შესახებ დოკუმენტში ასევე წერია, რომ გაგრძელდება სოციალურად დაუცველთა მხარდაჭერა ღია შრომის ბაზარზე დასაქმების ხელშესაწყობად. „შემუშავდება უმუშევრობის მხარდამჭერი სხვადასხვა მექანიზმი, მათ შორის, უმუშევრობის დაზღვევა და მისი დანერგვისთვის საჭირო სამოქმედო გეგმა. მუშაობა გაგრძელდება შრომითი უფლებების დაცვის გარანტიების დასაახლოებლად საუკეთესო საერთაშორისო სტანდარტებთან“, – აღნიშნულია ბიუჯეტის V თავში, მაგრამ ვადები დაკონკრეტებული არაა.