სოფლის მეურნეობის მინისტრი – შაქრის კუთხით მომარაგების შეფერხების საფუძველი არ არსებობს, ჩვენი ძირითადი მომწოდებელი არ არის არც რუსეთი და არც უკრაინა

გარემოს დაცვისა და სოფლის მეურნეობის მინისტრის, ოთარ შამუგიას განცხადებით, შაქრის კუთხით მომარაგების შეფერხების არანაირი საფუძველი არ არსებობს, რადგან საქართველოს ძირითადი მომწოდებელი არ არის არც რუსეთი და არც უკრაინა და ეს პროდუქტი შემოდის ბრაზილიიდან, პოლონეთიდან, თურქეთიდან.

როგორც შამუგიამ განაცხადა, პანიკის არანაირი საფუძველი არ არსებობს.

„რადგანაც გაიზარდა მოთხოვნა და გაიზარდა შესყიდვები მოსახლეობის მხრიდან, დისტრიბუცია ლოგისტიკურ ჯაჭვში ამ პროცესებს ვერ აყვა, რაც გამოსწორდება რამდენიმე დღეში და ჩვენ ვნახავთ, რომ ამ მიმართულებით პრობლემა არ არის“, – განაცხადა ოთარ შამუგიამ.

როგორც მინისტრმა აღნიშნა, იმპორტიორები და ბიზნესი მზადაა, რომ იმ პროდუქტებთან მიმართებით, რომელთა მოწოდებაშიც შესაძლოა გარკვეული შეფერხებები გაჩნდეს უკრაინაში მიმდინარე მოვლენებიდან გამომდინარე, სხვა ბაზრებიდან მოწოდებით ჩაანაცვლოს.

„ჩვენ მაქსიმალურად დავუჭერთ მხარს ჩვენს ბიზნესს, იმპორტიორებს, რათა მათ შესაბამის ბაზრებზე ჰქონდეთ წვდომა და ჩვენი საელჩოების, ჩვენი კოლეგა სამინისტროების მეშვეობით მაქსიმალურ მხარდაჭერას აღმოვუჩენთ კონტაქტების დამყარებაში და შესაბამისი ბაზრების მოძიებაში. ამ ეტაპზე იმპორტიორი ქვეყნების ჩანაცვლების საჭიროება არ დგას“, – განაცხადა ოთარ შამუგიამ, რომლის კომენტარს გარემოს დაცვისა და სოფლის მეურნეობის სამინისტრო ავრცელებს.

ბოლო დღეებში შაქარი საქართველოს სავაჭრო ობიექტებში ჯერ გაძვირდა, შემდეგ კი თაროებიდან საერთოდ გაქრა. მსგავსი სიტუაცია იყო ოზურგეთშიც, სადაც ამ პროდუქტის მწვავე დეფიციტი შეიქმნა.