სოფელ ქვემო აკეთში საპროტესტო აქცია გაიმართა

ლანჩხუთის მუნიციპალიტეტის სოფელ ქვემო აკეთის მოსახლეობამ საპროტესტო აქცია გამართა. აქციაზე ადგილობრივი მოსახლეობა ე.წ. კარიერის მუშაობის შეჩერებას ითხოვენ. საქმე ეხება მდინარე სუფსაზე მიმდინარე ინერტული მასალის მოპოვების სამუშაოებს, რომლის შედეგადაც, სოფელში არაერთი პრობლემა შეიქმნა. ქვემო აკეთში მცხოვრები მოსახლეობა მიიჩნევს, რომ სოფელში ჭების დაშრობა, მოსავლის კლება, მდინარის კალაპოტის ცვლილება და შიდა გზების გაფუჭება სწორედ ქვიშა–ხრეშის მოპოვების სამუშაოებს უკავშირდება. საპროტესტო აქციის მონაწილეები შიშობენ, რომ შესაძლოა მალე მათ სახნავ–სათესი ფართობებიც დაკარგონ, რადგან ე.წ. კარიერის მუშაობის შედეგად მდინარე მათ კუთვნილ მიწებსაც წაიღებს.
ადგილობრივი მოსახლეობა კომპანიისგან სოფლის დატოვებას ითხოვენ, ადგილობრივ ხელისუფლებას კი მოუწოდებენ აღნიშნულ პროცესში მოქალაქეებს ადვოკატირება გაუწიონ.