დღეს დილით კვლავ ხმაური იყო ოზურგეთში, სოფელ ნატანებში ავტობანის მშენებელ, თურქულ კომპანია ”ფოლადიოლთან”. აქ დასაქმებულებმა სამი მუშის სამსახურიდან დათხოვნა გააპროტესტეს და სამუშაოზე აღარ გავიდნენ.
ყველაფერი წინა კვირაში, მას შემდეგ დაიწყო, რაც 25 მუშამ კომპანიის ხელმძღვანელობას საკვების უკეთ დამზადება სთხოვა. საპასუხოდ კი ”ფოლადიოლმა” ის სამი მუშა სამსახურიდან გაათავისუფლა, რომლებიც აღნიშნულ საუბარს თარჯიმნობას უწევდნენ.
”მხოლოდ ის ვითხოვეთ, რომ ლობიო უკეთ მოეხარშათ და ზეთი მოეწვათ, თორემ ყველა ჩვენგანს კუჭის პრობლემები გაგვიჩნდა. უკეთეს საკვებს ხომ არ ვთხოვდით, მხოლოდ იმის უკეთ დამზადება გვინდოდა, რასაც გვთავაზობენ. იმის ნაცვლად კი, რომ ეს თხოვნა შეესრულებინათ, სამსახურიდან ის სამი მუშა გაუშვეს, რომლებმაც ეს საუბარი გადათარგმნეს, რადგან ჩვენ თურქული არ ვიცით, კომპანიის ხელმძღვანელობამ კი ქართული, რანაირი დამოკიდებულებაა, ჩვენც ადამიანები ვართ, 800 ლარად არაადამიანურად ვშრომობთ და საჭმელი მაინც რომ მოგვიხარშონ და უმი არ გვაჭამონ, აღარ ვიმსახურებთ?” – აცხადებდნენ მუშები.
ვითარებაში ოზურგეთის მუნიციპალიტეტის საკრებულოს დეპუტატები ”ნაციონალური მოძრაობიდან” ჩაერთვნენ, მათ კომპანიის ხელმძღვანელობასთან მოსალაპარაკებლად მივიდნენ. რის შემდეგაც კომპანიამ მუშები სამსახურში აღადგინა და მენიუს მოწესრიგების პირობაც დადო.
Loading ...