სოფელ ზიკილიაში სტალინის გამოსახულებიანი კონსტრუქცია აღმართეს

ახალციხის რაიონის სოფელ ზიკილიაში ადგილობრივებმა სტალინის გამოსახულებით რკინის კონსტრუქცია აღმართეს.

“ჩვენ თვითონ სოფელმა მოვინდომეთ და დავდგით. რადგან მოგვცეს მაშინ ნება. ამის მერე წლები გავიდა, ქარმა შეარყია და თავქვე დაეკიდა. მერე ისევ ხალხის მონდომებით, ავწიეთ, დავაყენეთ და ,,დავასვარკეთ“ – ამბობს სოფელ ზიკილიის მკვიდრი გურამ გაჩეჩილაძე.

შინმოუსვლელთა ობელისკთან სტალინის მონუმენტი სოფელ ზიკილიაში თავდაპირველად 1976 წლიდან დგას. ადგილობრივებმა სამი წლის წინ დაზიანებული რკინის კონსტრუქცია შეაკეთეს, შეღებეს და რამდენიმე დღის წინ ხელახლა აღმართეს.

მუნიციპალიტეტის მერიაში სტალინის გამოსახულებიანი რკინის კონსტრუქციის აღმართვაზე კომენტარს არ აკეთებენ. მერიაში რადიო თავისუფლებას უთხრეს, რომ კონსტრუქციის დადგმა თავად ადგილობრივებმა მოისურვეს.

2011 წლიდან საქართველოში ამოქმედდა „თავისუფლების ქარტია“, რომელიც კომუნისტური ტოტალიტარული იდეოლოგიის სიმბოლიკის გამოყენებას კრძალავს.

„თავისუფლების ქარტიის“ მე-7 მუხლში ნათქვამია, რომ ფაშიზმისა და კომუნიზმის სიმბოლიკები უნდა აღმოიფხვრას. ამავდროულად, მუნიციპალიტეტებს დაევალათ, მოიძიონ ინფორმაცია საბჭოთა სიმბოლოების საჯარო სივრცეში არსებობის შესახებ და ცნობები მიაწოდონ სპეციალურ კომისიას.

www.radiotavisupleba.ge