”სკამიც არ გვაქვს, რომ დავჯდე” – ოზურგეთში მცხოვრები ოჯახის სასტიკი რეალობა

სახიფათოდ ავარიული სახლი, სიცივე, შიმშილი და ავადმყოფობა – ეს ოზურგეთში მცხოვრები თამარ ტაბატაძის ოჯახის რეალობაა.

სახლი, რომელშიც ოთხი ადამიანი ცხოვრობს, ფაქტიურად დანგრევის პირასაა და ოჯახი კედლების ჩამონგრევას ყოველდღიურად ელოდება. ჭერის ჩამოშლის გამო სახლში დაზიანდა ავეჯიც, რის გამოც აქ მცხოვრები ადამიანები კარადის, მაგიდის და მსგავსი აუცილებელი საგნების გარეშე არიან დარჩენილები.

ოჯახში, სადაც ყველა წევრს მძიმე ავადმყოფობა აწუხებს, ცხოვრობს 16 წლის გოგონაც, რომელსაც არსებობისთვის არანაირი პირობები არ გააჩნია.

თამარ ტაბატაძის ცხოვრება ყოველდღიური არსებობისთვის ბრძოლაა, რაშიც პირველ რიგში შვილიშვილისთვის დღიური საკვების მოპოვება იგულისხმება, მაგრამ არანაკლებ დიდია ავარიული სახლის საფრთხეც.

ოზურგეთის მერიამ ოჯახს 6 111 ლარის ღირებულების სამშენებლო მასალის ნაწილი გადასცა, მაგრამ როგორც მერიაში აცხადებენ, ქალბატონის დახმარებას მომავალშიც გააგრძელებენ, მაგრამ მშენებლობის ვალდებულება მთავრობას არ გააჩნია. თამარ ტაბატაძისთვის კი აღნიშნული მასალით სახლის საკუთარი ძალებით აშენება სრულიად შეუძლებელია.

ამ ოჯახის პრობლემების შესახებ იცოდა და იცის ყველა დროის ხელისუფლებამ, მაგრამ მათი პრობლემების გადაჭრა ვერა და ვერ მოხერხდა. თუმცა თამარ ტაბატაძე ადგილობრივ მთავრობას მაინც იმედით შეჰყურებს,  რადგან იმედის გარდა სხვა ხელმოსაჭიდი ოჯახს აღარაფერი დარჩა.