„სინოფარმის“ ვაქცინის ავტორიზაციის საკითხს ჯანდაცვის მსოფლიო ორგანიზაცია კვირის ბოლომდე გადაწყვეტს

ჯანდაცვის მსოფლიო ორგანიზაცია ჩინური „სინოფარმის“ ვაქცინისთვის გადაუდებელი გამოყენების ავტორიზაციის მინიჭების საკითხს კვირის ბოლომდე გადაწყვეტს. ამის შესახებ ჩინეთის ტელევიზია CGTN იუწყება.

ჯანდაცვის მსოფლიო ორგანიზაციის ტექნიკურ მრჩეველთა ჯგუფმა „სინოფარმის“ მონაცემების მიმოხილვა 26 აპრილს დაიწყო და ეს პირველი შემთხვევაა, როდესაც ჩინური ვაქცინის მიმოხილვას გლობალური მარეგულირებელი აწარმოებს.

„სინოფარმის შესახებ გადაწყვეტილებას ამ კვირის ბოლომდე მივიღებთ“, — ამბობს მარიანჯელა სიმაო, ჯანდაცვის მსოფლიო ორგანიზაციის გენერალური დირექტორის თანაშემწე მედიკამენტებისა და ვაქცინების შეფასების საკითხებში.

მისივე განცხადებით, 3 მაისს დაიწყება მეორე ჩინური ვაქცინის „სინოვაკის“ მიმოხილვა, გადაწყვეტილება კი შემდეგი კვირის ბოლოს გახდება ცნობილი.

სინოფარმის კოვიდსაწინააღმდეგო ვაქცინა ჩინეთის გარდა ამჟამად რამდენიმე ქვეყანაშია დამტკიცებული, მათ შორის არაბთა გაერთიანებულ საამიროებში, ბაჰრეინში, პაკისტანში, უნგრეთში.

ამ ეტაპზე, სინოფარმს დეტალური მონაცემები საჯაროდ გამოქვეყნებული არ აქვს, მაგრამ აცხადებს, რომ კლინიკური ცდების III ფაზაში ვაქცინამ 79,34-პროცენტიანი ეფექტი აჩვენა.

რაც შეეხება „სინოვაკის“ მიერ წარმოებულ ვაქცინას, ჩილეში ჩატარებულ ცდებში მან 56,5-პროცენტიანი ეფექტი აჩვენა, ბრაზილიაში კი 50 პროცენტი.

სინოფარმის ვაქცინის ოფიციალური სახელია BBIBP-CorV და დამზადებულია დროში საკმაოდ გამოცდილი მეთოდით — ვირუსის ინაქტივიზაციის გზით; ამ შემთხვევაში გამოიყენება ინაქტივირებული კორონავირუსი, რომელსაც ორგანიზმში მოხვედრისას COVID-19-ის გამოწვევა არ შეუძლია, მაგრამ აღძრავს იმუნურ პასუხს და სხეულს ანტისხეულების წარმოქმნას აიძულებს.

ჯანდაცვის მსოფლიო ორგანიზაციის მხრიდან ავტორიზაციის შემთხვევაში, ჩინური ვაქცინები „კოვაქს“ პროგრამაში ჩაერთვება, რომელიც ვაქცინებით დაბალშემოსავლიან ქვეყნებს ამარაგებს.