”სახლები დაგვებზარა, ავტომობილები ეზოში ვერ შეგვყავს” – რას აპროტესტებენ ოზურგეთში, თაყაიშვილის ქუჩის მცხოვრებლები

ოზურგეთში, ექადიის უბნის მცხოვრებლებმა საპროტესტო აქცია გამართეს. ისინი თაყაიშვილის ქუჩაზე გზის მშენებლობაში დაშვებულ შეცდომებს აპროტესტებენ. მათი განცხადებით, ასფალტის დაგება, სანიაღვრე არხების და ტროტუარების მოწყობა აბსოლუტურად არასწორად და უხარისხოდ მიმდინარეობს, საცხოვრებელი სახლების ეზოებში ავტომობილით შესვლა თითქმის შეუძლებელია, რადგან ჯებირები ზედმეტად მაღალია. მშენებარე ტროტუარებზე მოსახლეობას უჭირს გადაადგილება, თავად ტროტუარებიც არასწორადაა დაგებული. უკვე დაბზარულია ახალდაგებული ასფალტიც. მძიმე ტექნიკის მუშაობამ კი საცხოვრებელი სახლების კედლები დააზიანა.

”საშინელი მდგომარეობაა, სახლების კედლები დაგვებზარა, გზა უხარისხოდაა დაგებული, პროექტი დასრულებული არ არის და უკვე ასფალტი ალაგ–ალაგ დაბზარულია. ტროტუარები ისეთი ვიწრო გააკეთეს, ადამიანი ნორმალურად ვერ გაივლის. ერთმა მეზობელმა ამის გამო ფეხი მოიტეხა. ხანშიშესული ქალბატონი ორჯერ დაგვემტვრა. ეზოების წინ კი იმხელა ჯებირები ამოგვიშენეს, მანქანა ვერ შეგვყავს და ვერ გამოგვყავს. ვითხოვთ სამუშაოების ხარისხიანად შესრულებას და მოყენებული ზარალის ანაზღაურებას” – აცხადებენ თაყაიშვილის ქუჩის მცხოვრებლები.

აღნიშნულ პროექტს თაყაიშვილის ქუჩაზე ჩინეთის გზებისა და ხიდების კომპანია ახორციელებს. კომპანიის წარმომადგენლები მოსახლეობასთან შეხვედრაზე არ გამოჩენილან.

 ადგილზე იმყოფებოდა უბნის მაჟორიტარი დეპუტატი დავით მდინარაძე, რომელმაც მოსახლეობის პროტესტი გაიზიარა. ის კომპანიასთან მოლაპარაკებას და მოქალაქეების ინტერესების დაცვას გეგმავს.

”სავსებით ლეგიტიმურია მოსახლეობის მოთხოვნები, დღეს ვგეგმავ კომპანიის წარმომადგენლებთან შეხვედრას. იმედი მაქვს, მოქალაქეების ინტერესებს გაითვალისწინებენ და პროექტს შეასწორებენ.” – განაცხადა დავით მდინარაძემ.