საწვავზე ფასები მაისში კიდევ უნდა შემცირდეს – კონკურენციის სააგენტო

საწვავზე საცალო ფასები მოკლევადიან ჭრილში უნდა შემცირდეს – ამის შესახებ აღნიშნულია საქართველოს კონკურენციისა და მომხმარებლის დაცვის სააგენტოს საავტომობილო საწვავის ბაზრის მონიტორინგის შედეგებში.

კონკურენციისა და მომხმარებლის დაცვის სააგენტომ (GCCA) საავტომობილო საწვავის ბაზარზე მიმდინარე მონიტორინგის ფარგლებში 2025 წლის პირველი კვარტლის შედეგები დღეს გამოაქვეყნა. ანგარიშის მიხედვით, ბენზინსა და დიზელზე, იანვრის თვეში – ფასების ზრდა ფიქსირდება, ხოლო თებერვალ-მარტის თვეში – ფასების კლება. იანვრის თვეში, საცალო ფასის ზრდა, ძირითად შემთხვევებში, განპირობებული იყო გაზრდილი თვითღირებულებით. კერძოდ, კომპანიების დონეზე, საცალო ფასის ზრდამ, საშუალოდ, 5-10 თეთრი შეადგინა, ხოლო იმპორტირებული / შიდა ბაზარზე შეძენილი საქონლის ღირებულება, ასევე რიგი კომპანიების შემთხვევაში – 3-10 თეთრით გაიზარდა.

„იანვრის თვეში, თვითღირებულების ზრდის ფაქტორი, ყველა კომპანიის შემთხვევაში, რელევანტური არ არის. შესაბამისად, ფასის ზრდა ყველა კომპანიის მიერ, მეტწილად, განპირობებული იყო ფასების პარალელიზმით, რაც განსახილველ ბაზარს ისტორიულად ახასიათებს.

www.bpn.ge