საშიშია თუ არა გაზეთში გახვეული თონის პური? – სურსათის უვნებლობის ექსპერტის გაფრთხილება

სურსათის უვნებლობის ექსპერტი ირაკლი არაბული სოციალურ ქსელში გავრცელებულ ვიდეომიმართვაში თონეებსა და პურის საცხობებში გავრცელებულ მავნე პრაქტიკაზე საუბრობს.

სპეციალისტი განმარტავს, რომ გაზეთის საღებავი (მელანი) შეიცავს ტოქსიკურ ნივთიერებებს, რომლებიც ცხელ პურთან კონტაქტისას პროდუქტში გადადის და ადამიანის ჯანმრთელობისთვის სერიოზულ საფრთხეს წარმოადგენს.

„ალბათ, ყველას გქონიათ შემთხვევა, როდესაც თონეში ნაყიდ ცხელ პურს გაზეთში გახვეულს გაწვდიან. რამდენად მართებულია ეს პრაქტიკა და რა საფრთხეს შეიცავს მსგავსი შეფუთვა?

პურის გაზეთში გახვევა, რომელიც დაფარულია სურსათისთვის დაუშვებელი მელნითა და საღებავებით, ჯანმრთელობისთვის სერიოზულ რისკს წარმოადგენს. როდესაც ცხელი პური ასეთ ზედაპირს ეხება, ქიმიური ნივთიერებები პროდუქტში გადადის. ამიტომ, თუ გამყიდველი პურს გაზეთში გიფუთავთ, აუცილებლად მიუთითეთ, რომ ეს დაუშვებელია.

ნებისმიერი საცხობი თუ საწარმო ვალდებულია, გამოიყენოს მხოლოდ სურსათთან კონტაქტისთვის ნებადართული მასალა. შესაფუთ ქაღალდს უნდა ჰქონდეს შესაბამისი სერტიფიკატი, რომელიც ადასტურებს, რომ ის უსაფრთხოა საკვებთან, მით უმეტეს – ცხელ პროდუქტთან შეხებისას.

შესაბამისად, თონეებსა და საცხობებს უნდა ჰქონდეთ სპეციალური შესაფუთი მასალა. არავითარ შემთხვევაში არ გამოიყენოთ ჩვეულებრივი გაზეთი, რადგან ეს პირდაპირ საფრთხეს უქმნის თქვენს ჯანმრთელობას“, – ამბობს ირაკლი არაბული.