საქმე გვაქვს უმძიმეს დანაშაულთან, რომელიც უტოლდება 9 აპრილის ტრაგედიას – ეს არის ტერორისტული აქტი საკუთარი მოქალაქეების წინააღმდეგ! – თაზო დათუნაშვილი

მოქალაქეების წინააღმდეგ ქიმიური იარაღის გამოყენება არის კაცობრიობის წინაშე დანაშაული – საქმე გვაქვს რუსული ტიპის მკვლელ პოლიტიკურ რეჟიმთან, საკუთარი შეუიარაღებელი მოქალაქეების წინააღმდეგ საბრძოლო იარაღს გამოიყენებენ მონსტრებთან. ჩვენ ვცხოვრობთ ბოროტი დიქტატურის ქვეშ, რომელშიც საკუთარ ხალხს ტერორისტულ აქტებს უწყობს ხელისუფლება, – ასე გამოეხმაურა „ლელო-ძლიერი საქართველოს“ ერთ-ერთი ლიდერი, თაზო დათუნაშვილი BBC-ის მიერ ჩატარებულ ჟურნალისტურ გამოძიებას.

როგორც მან აღნიშნა, ეს იარაღი არათუ სამოქალაქო პირებზე, არამედ დღეის მდგომარეობით, სამხედრო მოქმედებებშიც კი აკრძალული იარაღია.

„მოქალაქეების წინააღმდეგ ქიმიური იარაღის გამოყენება არის კაცობრიობის წინაშე დანაშაული. რეალურად ივანიშვილის რეჟიმის წინააღმდეგ ახალი საერთაშორისო მასშტაბის დავის საფუძველი გაჩნდა, თუ BBC -ის დოკუმენტური ფილმიდან დადასტურდა, რომ ყველაფერი, რაც ამ ფილმში ნათქვამია ქიმიურ შემადგენლობასთან დაკავშირებით, რაც მომიტინგეების წინააღმდეგ იქნა გამოყენებული, მართალია. რთულია BBC-ის დამაჯერებლობაში ეჭვის შეტანა.

რაც არ უნდა თქვას დღევანდელმა რუსულმა პროპაგანდამ, ის იმდენად რთული დანაშაულია, რომ ამ დანაშაულის მოკვლევაში სასწრაფოდ უნდა იქნას ჩართული ქიმიური იარაღის აკრძალვის მსოფლიო ორგანიზაცია. სახეზეა კონვენციის ხელმომწერი ქვეყნის მიერ, კონვენციის უხეში დარღვევა საკუთარი მოქალაქეების წინააღმდეგ. ასეთი რამ, შეგახსენებთ, რომ ბოლოს ჩვენს ქვეყანაში მოხდა 1989 წლის 9 აპრილს, როცა რუსეთის ჯარმა აკრძალული ქიმიური შემადგენლობა გამოიყენა და როდიონოვის ხელმძღვანელობით საქართველოს მშვიდობიანი მოქალაქეები დახოცა. ეს კიდევ ერთხელ, ყველაზე ნათლად და პირდაპირ ცხადყოფს, რომ საქმე გვაქვს რუსული ტიპის მკვლელ პოლიტიკურ რეჟიმთან. საკუთარი შეუიარაღებელი მოქალაქეების წინააღმდეგ საბრძოლო იარაღს გამოიყენებენ მონსტრებთან. ჩვენ ვცხოვრობთ ბოროტი დიქტატურის ქვეშ, რომელშიც საკუთარ ხალხს ტერორისტულ აქტებს უწყობს ხელისუფლება. დიახ, ეს არის ტერორისტული აქტი საკუთარი მოქალაქეების წინააღმდეგ, თუ ამ ქიმიური შემადგენლობის გამოყენება საბოლოოდ დადასტურდა.

ივანიშვილის მეთოდები ამ შემთხვევაში, პირდაპირ ნაკარნახევია მოსკოვიდან, რუსული მოდელიდან. ის იყენებს საკუთარი ხალხის წინააღმდეგ იგივე ბრძოლის ფორმებსა და იარაღებს, როგორც ამას იყენებდა ჩვენ წინააღმდეგ ოკუპანტი და როგორც ახლა ის იყენებს საკუთარი ხალხის წინააღმდეგ. რა პროპაგანდასაც არ უნდა დავუჯეროთ, როგორც შეიძლება არ მოგწონდეთ მე ან ვინმე სხვა, ეს ყველაფერი გვერდით გადასადებია, რადგან საქმე გვაქვს უმძიმეს დანაშაულთან საკუთარი მოქალაქეების წინაშე. უმძიმეს დანაშაულთან, რომელიც უტოლდება 9 აპრილის ტრაგედიას. ეს იარაღი არათუ სამოქალაქო პირებზე, არამედ დღეის მდგომარეობით, სამხედრო მოქმედებებშიც კი აკრძალული იარაღია, ის ქიმიური შემადგენლობა, რომელზეც საუბარია ამ დოკუმენტურ ფილმში. ეს არ არის უბრალოდ პოლიტიკური რეჟიმის პასუხი, ეს უკვე არის ჩვეულებრივი არაადამიანური დამოკიდებულება საკუთარი მოქალაქეების მიმართ. „ქართულმა ოცნებამ“ საკუთარი ოფიციალური პოზიცია გამოაქვეყნა და მისი შინაარსია, მსოფლიოში ერთ-ერთი ყველაზე ავტორიტეტული მედიაორგანიზაციის დისკრედიტაცია, როგორც „ფეიკმედიის“ და ა.შ.

BBC ითვლება მსოფლიოში ერთ-ერთ ყველაზე ავტორიტეტულ და ჟურნალისტური გამოძიების მწარმოებელ ორგანიზაციად, რომლის ერთწლიან გამოძიებაში ეჭვის შეტანა არის უკიდურესი უტიფრობა „ქართული ოცნების“ მხრიდან“, – განაცხადა თაზო დათუნაშვილმა.

შეგახსენებთ, BBC-მ გაავრცელა ინფორმაცია, რომ მათ მიერ შეგროვებული მტკიცებულებები მიუთითებს, რომ საქართველოს ხელისუფლებამ გასულ წელს მთავრობის საწინააღმდეგო საპროტესტო აქციების ჩასახშობად პირველი მსოფლიო ომის დროინდელი ქიმიური იარაღი გამოიყენა.

როგორც BBC-ი წერს, “საქართველოს მთავრობის მიერ ევროკავშირში გაწევრიანების პროცესის შეჩერების წინააღმდეგ მებრძოლი დემონსტრანტები სხვადასხვა სიმპტომებს უჩიოდნენ მათ შორის თვალების წვას, ქოშინს, ხველასა და ღებინებას, რომელიც კვირების განმავლობაში გაგრძელდა“.

BBC-ის ცნობითვე, ესაუბრნენ World Service-ი ქიმიური იარაღის ექსპერტებს, საქართველოს სპეცრაზმის წარმომადგენლებსა და ექიმებს და აღმოაჩინეს, რომ „მტკიცებულებები მიუთითებს იმ აგენტის გამოყენებაზე, რომელსაც საფრანგეთის სამხედროებმა „კამიტი“ უწოდეს“.