აშშ-ის სახელმწიფო დეპარტამენტმა საქართველო იმ ქვეყნების სიას დაამატა, რომლის მოქალაქეებსაც გარკვეული ტიპის, მათ შორის სამოგზაურო ვიზებისთვის 15 000 დოლარამდე სავიზო გირაოს გადახდა მოუწევთ. ინფორმაციას აშშ-ის სახელმწიფო დეპარტამენტი ავრცელებს. აღნიშნული ცვლილება მიმდინარე წლის 2 აპრილიდან ამოქმედდება.
18 მარტს სახელმწიფო დეპარტამენტმა საქართველოს და კიდევ 11 ქვეყანას დააკისრა აღნიშნული სავიზო გირაოს გადახდა. ეს ქვეყნებია: კამბოჯა, ეთიოპია, გრენადა, ლესოთო, მავრიკი, მონღოლეთი, მოზამბიკი, ნიკარაგუა, პაპუა-ახალი გვინეა, სეიშელები, ტუნისი). ბოლო ცვლილებით, მაღალი რისკის ქვეყანათა რაოდენობა, რომლებზეც სავიზო გირაოს პროგრამა ვრცელდება, 50-მდე გაიზარდა და მათ შორის საქართველო ერთადერთი ევროპული ქვეყანაა.
სახდეპი წერს, რომ ნებისმიერმა მოქალაქემ ან მოქალაქემ, რომელიც მოგზაურობს ამ ქვეყნებიდან ერთ-ერთის მიერ გაცემული პასპორტით და რომელსაც აქვს B1/B2 ვიზის მიღების უფლება, უნდა წარადგინოს 5 000, 10 000 ან 15 000 აშშ დოლარის ოდენობის გირაო. თანხა განისაზღვრება ვიზასთან დაკავშირებული გასაუბრების დროს. განმცხადებელმა ასევე უნდა წარადგინოს შინაგანი უსაფრთხოების დეპარტამენტის I-352 ფორმა.
სახდეპის ვებგვერდზე გამოქვეყნებულ ინფორმაციაში ასევე აღნიშნულია, რომ გირაო არ იძლევა ვიზის გაცემის გარანტიას. სავიზო გირაო აპლიკანტებს იმ შემთხვევაში დაუბრუნდებათ თუ სამშობლოში ვიზის პერიოდისა და გირაოს პირობების შესაბამისად დაბრუნდებიან ან საერთოდ არ იმოგზაურებენ.
Loading ...