2025 წლის იანვრიდან საქართველოში 2013 წლამდე გამოშვებული სატვირთო, სამგზავრო და სამედიცინო დანიშნულების ტრანსპორტის რეგისტრაცია აიკრძალა. შეზღუდვა შეეხო ყველა იმ ტრანსპორტს, რომელიც M3, N1, N2 და N3 კატეგორიას მიეკუთვნება. რეგულაცია ევრო-5 სტანდარტზე გადასვლას უკავშირდება, რომელიც ავტომობილის გამონაბოლქვის აირებში მავნე ნივთიერებების შემცველობას არეგულირებს.
გადაწყვეტილება არ შეეხება ქვეყანაში უკვე მყოფ სატვირთო ავტომობილებს, ავტობუსებს და სამედიცინო დანიშნულების ავტომობილებს, ასევე ამ კატეგორიის იმ სატრანსპორტო საშუალებებს, რომლებიც ქვეყანაში რეექსპორტისა და ტრანზიტის მიზნით შემოდის.
ავტოიმპორტიორთა ასოციაციაში განმარტავენ, რომ ქვეყანაში საკმაოდ მოძველებული ავტოპარკია, რომელზედაც აღნიშნული რეგულაცია ვრცელდება, ამიტომ ბუნებრივია ტრანსპორტის განახლება ფინანსური ხარჯების ზრდას იწვევს. აქედან გამომდინარე, ალექსი ნონიაძე ამბობს, რომ რეგულაციის გავლენით უკვე რეგისტრირებულ ავტომობილებზე მოთხოვნა და შესაბამისად, ფასიც გაიზრდება.
“დისტრიბუციის მანქანების დიდი ნაწილი არ არის ახალი, საკმაოდ მოძველებული ავტომობილებია, ეს თავისთავად პრობლემაა ეკოლოგიისთვის, სატრანსპორტო მოძრაობისთვის, მაგრამ უნდა აღინიშნოს, რომ ფინანსურად უჭირთ ამ კომპანიებს ახალი ავტომობილების შეძენა. ამის შემდეგ 2013 წლის ქვემოთ ავტომობილებს ვერ შეიძენენ და ბუნებრივია ეს ისევ აისახება ერთი მხრივ ავტომობილების ფასებზე, ასევე გაიზრდება მიტანის სერვისის თვითღირებულება და გაძვირდება პროდუქტები.
ადგილზე ავტომობილები, რომელიც უკვე რეგისტრირებულია, ბუნებრივია მათზეც გაიზრდება მოთხოვნა, იგულისხმება 2013 წელს ქვემოთ ავტომობილები. ვფიქრობ, რომ ფასის მატება მოხდება უკვე რეგისტრირებულ ავტომობილებთან მიმართებით.
იგივე ითქმის სპეცტექნიკასთან დაკავშირებით, რომელიც მშენებლობაზე და სხვადასხვა სფეროში არიან დაკავებული. აქაც პრობლემა გაჩნდება იმის, რომ მათ მიერ შესრულებული სამუშაოს თვითღირებულება გაიზრდება და შესაბამისად ფასიც გაიზრდება”, – აცხადებს ალექსი ნონიაძე.
აღსანიშნავია, რომ კერძო სექტორის მიმართვის შემდეგ მთავრობამ საშეღავათო პერიოდი დაუწესა იმ იმპორტიორებს, რომელთა ავტომობილებიც რეგულაციის ამოქმედების დროისთვის გზაშია და ქვეყანაში ჯერ არ შემოსულა. კერძოდ, ის სატრანსპორტო საშუალებები, რომელთა ტრანსპორტირებაც 2025 წლის 1-ელ იანვრამდე დაიწყო, საქართველოში ჩვეულებრივ დარეგისტრირდებიან. მათ სპეციალური დოკუმენტი უნდა წარმოადგინონ, რომელიც ადასტურებს ავტომობილის საზღვაო კონტეინერში ჩატვირთვას ან/და გამომგზავნ საზღვაო პორტში მიღებას 2025 წლის 1-ელ იანვრამდე.
ავტომობილებისთვის ევრო 5 სტანდარტი საქართველოში 2024 წლიდან ამოქმედდა. შესაბამისად, გასული წლის 1-ელი იანვრიდან ქვეყანაში ვეღარ რეგისტრირდება 2013 წელს ქვემოთ წლოვანების მსუბუქი ავტომანქანები, რომლებიც მოთხოვნილ ევრო 5 სტანდარტს ვერ აკმაყოფილებს.
www.bm.ge
Loading ...
