საქართველოს დაავადებათა კონტროლის ეროვნული ცენტრის მონაცემებით, გასული დღის განმავლობაში, 30 ნოემბერს, კოვიდინფექციის საწინააღმდეგო ვაქცინით აიცრა 11 999 ადამიანი.
საქართველოში ვაქცინაცია 15 მარტს დაიწყო. დღემდე გაკეთებულია 2 183 335 აცრა. სულ მცირე ერთი დოზით ვაქცინირებულია 1 165 835 ადამიანი, ანუ მოზრდილი მოსახლეობის 41%. სრულად ვაქცინირებულია – 1 001 801, რაც მოზრდილი მოსახლეობის 35.1%-ია. სტატისტიკის ეროვნული სამსახურის მონაცემებით, 2021 წლის 1 იანვრისთვის საქართველოს მოსახლეობა 3 728 000-ს აჭარბებდა.
ოქტომბრიდან მკვეთრად შემცირებულმა აცრის მაჩვენებელმა შედარებით მოიმატა ნოემბრიდან, მას შემდეგ, რაც სახელმწიფომ დაიწყო 60 წლის და უფროსი ასაკის მოქალაქეებითვის, პირველი დოზით აცრის შემდეგ 200-ლარიანი დანამატის გადახდა.
51 757 აცრა 200-ლარიანი დანამატის სანაცვლოდ – როგორ მუშაობს მთავრობის წამახალისებელი პროგრამა?
პირველ ეტაპზე, იმუნიზაციის მიზნის მისაღწევად, დაავადებათა კონტროლის ეროვნული ცენტრი და ჯანდაცვის სამინისტრო საჭიროდ მიიჩნევდნენ წლის ბოლომდე, მოზრდილი მოსახლეობის სულ მცირე 60%-ის აცრას. თუმცა, მოგვიანებით ცენტრის დირექტორმა, ამირან გამყრელიძემ რამდენჯერმე განაცხადა, რომ კორონავირუსის უფრო რთული და გადამდები “დელტა” ვარიანტის მასობრივად გავრცელების გამო, ეპიდემიის შესაჩერებლად საჭირო იყო სულ მცირე 80%-ის ვაქცინაცია.
10 ნოემბრიდან საქართველოში, კოვიდის საწინააღმდეგო “ფაიზერის” ვაქცინით აცრა შეუძლიათ 12-დან 15 წლამდე ასაკის მოზარდებს. 10 ნოემბრიდან ქვეყანაში შესაძლებელია ვაქცინის მესამე, ე.წ. ბუსტერ დოზის გაკეთებაც.
Loading ...
