საქართველოს საფეხბურთო ნაკრებმა ერთა ლიგის მიმდინარე გათამაშების ჯგუფურ ეტაპზე ბოლო, მეექვსე მატჩი გამართა. ვილი სანიოლის გუნდი გიბრალტარს ეწვია და 2:1 დაამარცხა. ამ მოგებით საქართველომ ერთა ლიგის C დივიზიონში მონაწილე 16 გუნდს შორის საუკეთესო შედეგი უჩვენა, რაც იმას ნიშნავს, რომ ლიგის ნახევარფინალური შეხვედრა თბილისში გაიმართება.
ვინ შეხვდება საქართველოს 27 სექტემბერს ჩრდილოეთ ირლანდიისა და საბერძნეთის მატჩის დასრულების შემდეგ გაირკვევა.
როგორც მოსალოდნელი იყო, გიბრალტარი მთელი გუნდით დაცვაში იყო და უმთავრესად გოლის არგაშვებაზე ზრუნავდა. პირველ ტაიმში მიზანს მიაღწევდა, რომ არა ხვიჩა კვარაცხელიას ინდივიდუალური ოსტატობა: ნაპოლელმა პენალტი მოიპოვა და თავად გარდასახა გოლად.
მეორე ტაიმი საქართველოს ნაკრების მწვავე შეტევებით დაიწყო და მეორე გოლიც მალე ვიხილეთ. ამჯერად გიორგი წიტაიშვილი შეიჭრა საჯარიმოში ეფექტურად და – 2:0.
საინტერესოა, რომ ეს გახლდათ საქართველოს ნაკრების ზედიზედ მე-11 წაუგებლად ჩატარებული მატჩი. აქამდე რეკორდი თემურ ქეცბაიას ფორმაციის ნაკრებს ეკუთვნოდა, რომელსაც 10 წაუგებელი შეხვედრა ჰქონდა.
Loading ...
