პოლონეთში საქართველოს მოქალაქე საზღვრის უკანონო გადაკვეთის ორგანიზებისთვის დააკავეს. ამის შესახებ ინფორმაციას ადგილობრივი მედია სასაზღვრო დაცვის სამსახურზე დაყრდნობით ავრცელებს.
სასაზღვრო დაცვის პრესსამსახურის ცნობით, ოთხშაბათს, კალიშის სასაზღვრო დაცვის თანამშრომლებმა სლუპცას რაიონში, მაგისტრალზე შემოწმების მიზნით გააჩერეს Ford-ის მარკის მანქანა, რომელსაც 45 წლის ქართველი მართავდა, მისი მგზავრი კი ავღანეთის მოქალაქე იყო, რომელსაც პოლონეთში ყოფნის უფლება არ ჰქონდა.
საქართველოს მოქალაქე დააკავეს და სახელმწიფო საზღვრის უკანონო გადაკვეთის ორგანიზებაში დაადანაშაულეს. მას 8 წლამდე თავისუფლების აღკვეთა ემუქრება. ასევე პოლონეთის ტერიტორიის იძულებით დატოვების მიზნით მის წინააღმდეგ ადმინისტრაციული წარმოება დაიწყო. გადაწყვეტილების მიღებამდე ის უცხოელებისთვის განკუთვნილ დაცულ ცენტრში იმყოფებოდა.
რაც შეეხება ავღანეთის მოქალაქეს, რომელიც პოლონეთში არალეგალურად იმყოფებოდა და გერმანიაში გადასვლას ცდილობდა, დეპორტაცია ემუქრება. ასევე, მას სამი წლით აეკრძალა შენგენის ზონაში ხელახლა შესვლა და სასაზღვრო დაცვის მეთვალყურეობის ქვეშ მოექცა.
კომენტარები
Loading ...