“საფრანგეთი დიდია და ატომური ბომბი აქვს, ჩვენ ვართ პატარა და არ გვაქვს ატომური ბომბი” – პაპუაშვილი

საქართველოს პარლამენტის თავმჯდომარემ შალვა პაპუაშვილმა საფრანგეთში შემუშავებულ კანონსა და საქართველოში მიღებულ გამჭვირვალობის კანონს შორის განსხვავებაზე ისაუბრა.

„განმასხვავებელი ის არის, რომ საფრანგეთი დიდია და ატომური ბომბი აქვს, ჩვენ ვართ პატარა და არ გვაქვს ატომური ბომბი. ამიტომ საფრანგეთს შეიძლება, ჰქონდეს ასეთი კანონები და ზოგიერთს ჰქონია, რომ ჩვენთვის არ შეიძლება. ეს არის სინამდვილეში განსხვავება. ჩვენ ზოგიერთი გვიყურებს ზემოდან. ვგონივართ შეუმდგარი სახელმწიფო. ჰგონიათ, რომ აქ თითქმის ოთხი მილიონი ადამიანი ტერიტორიაზე უბრალოდ, მოძრაობს, დილით გაიღვიძებს, წავა სამსახურში, დაბრუნდება და ფიქრობს, არ შეიძლება, გვქონდეს ჩვენი უსაფრთხოების, სახელმწიფო ინტერესები, არ შეიძლება გვქონდეს განსხვავებული აზრი, თუ როგორ გვინდა, რომ ჩვენი ქვეყანა განვითარდეს. ფიქრობენ, რომ საკმარისია, გვქონდეს 9 რეკომენდაცია და სახელმწიფომ გაიღვიძოს და დაიძინოს 9 რეკომენდაციაზე მუშაობით”, – განაცხადა შალვა პაპუაშვილმა.

მისი შეფასებით, საქართველოს ეროვნული ინტერესები ზოგ პარტნიორს არ აინტერესებს.

“სხვა დანარჩენი თემები, რაც ჩვენი ეროვნული ინტერესია, არ აინტერესებს ზოგიერთ ქვეყანას, რომელიც ზემოდან გვიყურებს, სხვათა შორის, ზომის მიუხედავად. მათ შორის, ბალტიის ზოგიერთი ქვეყნის წარმომადგენლის აქციაზე დგომა იმასაც გვაჩვენებს, რომ ევროკავშირის წევრ ქვეყანას, რომელიც ჩვენზე პატარაა ზომითაც და მოსახლეობითაც, რატომღაც ჰგონია, რომ ზემოდან უნდა გვიყუროს და ჭკუა გვასწავლოს. რატომ ჰგონია ასე ესტონეთის საგარეო საქმეთა მინისტრს, დღემდე ვერ მივხვდი. ვიღაცებმა თავი შეაფარეს ევროკავშირს, გარანტირებული აქვთ ატომური დაცვის ქოლგა, ევროკავშირის სუბსიდიები, უსაფრთხოება. ჩვენ კი ამ გარანტიების გარეშე, ომის საფრთხის ქვეშ და ოკუპაციის პირობებში ვცხოვრობთ უკვე 30 წელია და ეკონომიკურად წინ მიიწევს ჩვენი ქვეყანა. იმის მიუხედავად, რომ იყო ბევრი მცდელობა, რომ შეერყიათ ეს ქვეყანა შიგნიდან თუ გარედან, ვერავინ მიაღწია იმ შედეგს, რომელიც მათ სურდათ”, – განაცხადა საქართველოს პარლამენტის თავმჯდომარემ.

დეპუტატები და სენატორები საფრანგეთში უცხოური ჩარევის წინააღმდეგ კანონის ტექსტზე შეთანხმდნენ. კანონი ითვალისწინებს უცხო ძალის სახელით/სასარგებლოდ მოქმედი იმ აქტორების რეგისტრაციის ვალდებულებას, რომლებიც გავლენას ახდენენ საფრანგეთის საზოგადოებრივ ცხოვრებაზე. ზოგადად, კანონით, უცხო სახელმწიფოს სახელით ჩადენილი დანაშაული უფრო მკაცრად დაისჯება.