სარჩელი კალაძის წინააღმდეგ – სოციალურად დაუცველები მერს უჩივიან

დაგვიბრუნეთ ჩვენი სახლები, შეწყდეს სახლების უკანონო ნგრევა – ამ მოთხოვნით კოჯორში ჩასახლებულმა სოციალურად დაუცველმა პირებმა საქართველოს პროკურატურასთან აქცია გამართეს.

მოქალაქეები, რომლებიც კოჯორში საცხოვრებელი სახლებიდან გამოასახლეს, კახა კალაძეს უჩივიან. 21 წლის განმავლობაში სოციალურად დაუცველი ოჯახები ძველი საერთო საცხოვრებლის ტერიტორიაზე ადგილობრივი გამგეობის ნებართვით ცხოვრობდნენ. 2021 წლის დეკემბერში გასხვისებული შენობის დატოვების შესახებ მერიამ მოსახლეობას რამდენიმე თვის წინ შეატყობინა. წინააღმდეგობის გაწევის შემდეგ კი კომპანიამ, რომელიც ახლა ამ ტერიტორიას ფლობს, ერთ-ერთი საცხოვრებელი სახლი უბრალოდ დაანგრია.

მოქალაქეები ალტერნატიულ ფართს, ან აღნიშნული ფართების დაკანონებას ითხოვენ.

უმეტესობა ვართ სოციალურად დაუცველები. ჩვენი ოჯახი პირადად 23 წელია, ამ შენობაში, კოჯორში ცხოვრობს. ვითხოვთ ალტერნატიულ ფართს, რადგან სხვა თავშესაფარი არ გაგვაჩნია. უკანონოდ გასხვისდა ტერიტორია, სადაც ვცხოვრობდით. 

გვაბრალებენ, რომ უკანონოდ ვართ შეჭრილები. ჩვენ ფართი მოგვცა მუნიციპალიტეტმა. ახლა სად წავიდეთ? – ამბობს სოციალურად დაუცველი ერთ-ერთი პირი.