კიევში სარაკეტო დარტყმას რადიო თავისუფლების თანამშრომელი ვირა ჰირიჩი ემსხვერპლა. ინფორმაცია ამის თაობაზე მისმა კოლეგამ ალექსანდრ დემჩენკომ გაავრცელა, მოგვიანებით ეს ინფორმაცია რადიო თავისუფლების კიევის ბიურომაც დაადასტურა.
ვირა ჰირიჩი რადიო თავისუფლების კიევის ბიუროში 2018 წლიდან მუშაობდა. ჰირიჩი საკუთარ სახლში იმყოფებოდა, როდესაც კორპუსს ჭურვი მოხვდა. ჟურნალისტის ცხედარი დილით ნანგრევებში აღმოაჩინეს.
ალექსანდრ დემჩენკო დანგრეული სახლის წინ გადაღებულ ფოტოს აქვეყნებს:
„ეს პატარა მანქანა ვირა ჰირიჩისაა, ჩემი კოლეგის რადიო თავისუფლებიდან. ორიოდე წლის წინ ამ მანქანით ნემეშაევოში წაგვიყვანა, ოკუპირებულ ტერიტორიაზე რაც ხდებოდა, ის რომ გაგვეშუქებინა.
ახლა ვირა აღარაა. რუსული რაკეტა მის სახლს მოხვდა. ეს წერტილოვანი დარტყმა იყო. ვირა მთელი ღამე იქ იწვა, მხოლოდ დილით ნახეს.
უბრალოდ არ ვიცი, როგორ გადმოვცე, რა არაჩვეულებრივი ადამიანი აღარაა ამქვეყნად“.
გუშინ კიევს სულ მცირე ორჯერ დაარტყეს. კიევის მთავრობის ინფორმაციით, ერთი რაკეტა ოცდახუთსართულიან კორპუსს მოხვდა შევჩენკოს რაიონში. დაიჭრა 10 ადამიანი. დღეს კიევის მერმა განაცხადა, რომ ნანგრევებიდან ერთი დაღუპულის ცხედარი ამოასვენეს.
www.radiotavisupleba.ge
Loading ...
