სოხუმის ცენტრში ისევ იკრიბებიან საპროტესტო აქციის მონაწილეები, რომლებიც აფხაზეთის დე ფაქტო პრეზიდენტის, რაულ ხაჯიმბას გადადგომას მოითხოვენ. ამის შესახებ სოხუმიდან იუწყება სააგენტო „ტას“-ის კორესპონდენტი. მას აქციის ორგანიზატორებმა უთხრეს, რომ “პრეზიდენტის ადმინისტრაციაში” რჩება შენობაში 9 იანვარს შეჭრილი 300-მდე ადამიანი. 10 იანვარს, დილის 10 საათისთვის შენობის წინ მდებარე მოედანზეც დაახლოებით ამდენივე იმყოფება.
სოხუმში, სადაც ე.წ. უზენაესი სასამართლოს საკასაციო კოლეგია განიხილავს „პრეზიდენტობის“ ყოფილი კანდიდატის, ალხას კვიცინიას სარჩელს შარშანდელი „არჩევნების“ შედეგების გაუქმების შესახებ, 9 იანვარს, დღისით დაიწყო ოპოზიციის საპროტესტო აქცია. მოგვიანებით, აქციის მონაწილეთა ნაწილი დე ფაქტო პრეზიდენტის ადმინისტრაციის შენობაში შეიჭრა. მათ ხაჯიმბას გადადგომა მოითხოვეს.
სოხუმში განვითარებული მოვლენების გამო, დე ფაქტო რესპუბლიკის პარლამენტმა 9 იანვარს, ღამით რაულ ხაჯიმბას მიმართა, თანამდებობიდან გადადგეს დესტაბილიზაციის გაღრმავების თავიდან ასაცილებლად. საპასუხოდ ხაჯიმბამ განაცხადა, რომ გადადგომას არ აპირებს და ოპოზიციას მოლაპარაკებისკენ მოუწოდა.
რუსეთის მიერ ოკუპირებულ აფხაზეთში 2019 წლის 8 სექტემბერს გამართული ე.წ. საპრეზიდენტო არჩევნების მეორე ტურში, მოქმედმა დე ფაქტო პრეზიდენტმა რაულ ხაჯიმბამ გაიმარჯვა 47.38%-ით. ოპოზიციური პარტიის „ამცახარა“-ს კანდიდატს ალხას კვიცინიას ხმა მისცა 46.19%-მა. 9 სექტემბერს კვიცინიამ განაცხადა, რომ ვერც ერთმა კანდიდატმა ვერ მოიპოვა პრეზიდენტად კანონიერად არჩევისთვის საჭირო ხმები, ამიტომ ხელახალი არჩევნები უნდა ჩატარდეს. დე ფაქტო ცენტრალურმა საარჩევნო კომისიამ არ დააკმაყოფილა ალხას კვიცინიას მიმართვა შედეგების ბათილად გამოცხადების შესახებ. ამის შემდეგ კვიცინიამ სასამართლოში იჩივლა.
9 იანვარს, აფხაზეთის დე ფაქტო რესპუბლიკის უზენაესი სასამართლოს საკასაციო კოლეგიამ დააკმაყოფილა კვიცინიას ადვოკატის შუამდგომლობა ერთ-ერთი მოსამართლოს აცილების შესახებ და საქმის განხილვა გაურკვეველი დროით გადადო.
www.radiotavisupleba.ge
Loading ...