საპროტესტო აქციის დაშლისას რადიო თავისუფლების ჟურნალისტი, დავით ცაგარელი დაშავდა

რუსთაველის გამზირზე დემონსტრაციის დარჩენილი ნაწილის დარბევისას პოლიციამ ფიზიკურად იძალადა რადიო თავისუფლების კიდევ ერთ რეპორტიორზე.

გამოცემის ინფორმაციით, მეცნიერებათა აკადემიასთან, როდესაც ჟურნალისტი, დათო ცაგარელი პროფესიულ მოვალეობას ასრულებდა – პირდაპირ ეთერში ერთვებოდა – ნიღბიანმა სპეცრაზმელმა მუცლის არეში მუშტი ჩაარტყა.

ჟურნალისტს ეცვა პრესის მაიდენტიფიცირებელი ქურთუკი და ხელში მობილური ტელეფონი ეჭირა, რომლითაც პირდაპირ ეთერში იყო.

მთელი ღამის განმავლობაში აქციის დარბევის შემდეგ პოლიცია მოქალაქეების დევნასა და დაკავებას აგრძელებს. ამჯერადაც დაკავებების პარალელურად გრძელდებოდა ძალადობა.

გამთენიისას, დაახლოებით 06:30-ზე პოლიციელების დიდი ჯგუფი რესპუბლიკის მოედნის მიმართულებით დაიძრა და გზადაგზა მშვიდობიანი მოქალაქეების დაკავება დაიწყო. როგორც ჩანს, შსს-ს თანამშრომლები რუსთაველის გამზირს წმენდენ. ერთ-ერთი ადამიანის დასაკავებლად ისინი აფთიაქშიც შევიდნენ.

ღამის განმავლობაში პოლიციამ დემონსტრანტების წინააღმდეგ წყლის ჭავლი და წიწაკის სპრეი გამოიყენა როგორც ცალ-ცალკე, ისე ერთად. ამასთან განსაკუთრებულ დავალებათა დეპარტამენტის თანამშრომლები და ნიღბიანი, შავებში ჩაცმული, ზურგჩანთიანი პირები, რომლებიც გაურკვეველია, რომელ სამსახურს წარმოადგენდნენ, მოქალაქეებს ფიზიკურად უსწორდებოდნენ.

ჯერჯერობით უცნობია რამდენი ადამიანია ჯამში დაკავებული, თუმცა სავარაუდოდ რიცხვი რამდენიმე ათეულია. ამასთან, დაშავებულია ათეულობით ადამიანი, მათ შორის პოლიტიკოსები და ჟურნალისტები.

როგორც ცნობილია, კოალიცია ცვლილებებისთვის ლიდერებს, ნანა მალაშხიას ცხვირი აქვს მოტეხილი, ხოლო ელენე ხოშტარიას – ხელი.