ოზურგეთის მუნიციპალიტეტის სოფელი მელექედურის მოსახლეობამ საპროტესტო აქცია გამართა. მელექედურელები მდინარე ნატანებზე “კარიერების” არსებობას აპროტესტებენ. როგორც ადგილობრივები ამბობენ, უკვე სამი წელია მდინარიდან ინერტული მასალების მოპოვება ხდება, რის გამოც იცვლება მდინარის კალაპოტი, მცირდება საყანე ფართობები, ფუჭდება გზები და ჭებში წყალი შრება.
მოსახლეობა ამბობს, რომ თუკი კომპანია” პლატინა” მდინარე ნატანებზე მუშაობას არ შეწყვეტს, სოფლის მცხოვრებლები ცენტრალურ გზებს გადაკეტავენ და სხვა რადიკალურ ზომებს მიმართავენ.
”ადგილობრივმა ხელისუფლებამაც იცის, ყველა საქმის კურსშია, მაგრამ მაინც არ ეშველა ამ საქმეს არაფერი. მოსახლეობა სასტიკი წინააღმდეგია, რომ მდინარე ნატანებზე კარიერები მუშაობდეს, მაგრამ ვითარება მაინც არ იცვლება” – განაცხადა მერის წარმომადგენელმა სოფელ მელექედურში, კახა მესხიამ.
შპს “პლატინა” – ს წარმომადგენლები დღეს ადგილზე არ იმყოფებოდნენ. როგორც გაირკვა, გარემოს დაცვითი ზედამხედველობის დეპარტამენტი კომპანიის ლიცენზიას, სხვა დოკუმენტაციას და საქმიანობას შეამოწმებს და მოსახლეობას უახლოეს დღეებში აცნობებს.
Loading ...