სამხარაულმა ლაშქარავას საქმეზე ექსპერტიზის დასკვნა მოამზადა – რა წერია დოკუმენტში

ლევან სამხარაულის სახელობის ექსპერტიზის ეროვნულმა ბიურომ „ტვ პირველის“ ოპერატორის ლექსო ლაშქარავას საქმესთან დაკავშირებით დასკვნა მოამზადა. აღნიშნული დასკვნა შსს-მ ექსპერტიზის ეროვნული ბიუროდან 2021 წლის 30 დეკემბერს მიიღო. როგორც უწყებაში აცხადებენ, დასკვნა ლექსო ლაშქარავას გარდაცვალების ფაქტზე მიმდინარე სისხლის სამართლის საქმეს დაერთო.

ექსპერტიზის ეროვნული ბიუროს დასკვნის თანახმად, ლექსო ლაშქარავას სიკვდილის მიზეზია ნარკოტიკული საშუალება „ჰეროინით“ ინტოქსიკაციის შედეგად განვითარებული გულ-სისხლძარღვთა და სუნთქვის მწვავე უკმარისობა.

„გვამის სასამართლო სამედიცინო და ქიმიურ ტოქსიკოლოგიური გამოკვლევების მონაცემებით, მოქ. ალექსანდრე ლაშქარავას სიკვდილის მიზეზია ნარკოტიკული საშუალება „ჰეროინით“ ინტოქსიკაციის შედეგად განვითარებული გულ-სისხლძარღვთა და სუნთქვის მწვავე უკმარისობა (ინექციის უბნები ორივე საზარდულის მიდამოში).

ორმხრივ საზარდულის მიდამოს კანში და კანქვეშა ცხომოვან ქსოვილში აღენიშნებოდა სისხლჩაქცევები, მარცხნივ ხანდაზმულობით სიკვდილამდე 5 წუთი-1 საათი, მარჯვნივ 30 წუთი- 4 საათი.

გვამიდან აღებული ბიოლოგიური ობიექტების ქიმიურ-ტოქსიკოლოგიური გამოკვლევით: ორივე საზარდულის მიდამოდან აღებულ კანის და რბილ ქსოვილების პრეპარატებში ნარკოტიკული საშუალებები: ჰეროინი, მორფინი, კოდეინი და 6- მონოაცეტილორფინი; სისხლში ნარკოტიკული საშუალებები: მორფინი 118.0 ნგ/მლ, კოდეინი 18.1 ნგ/მლ და 6 მონოაცეტილმორფინი 15,1 ნგ/მლ ოდენობით; შარდში ნარკოტიკული საშუალებები: მორფინი, 7766.3 ნგ/მლ, კოდეინი 48.5 ნგ/მლ; 6- მონოაცეტილმორფინი 1356.8 ნგ/მლ; ნარკოტიკული საშუალება ტეტრაჰიდროკანაბინოლი და მისი მეტაბოლიტი (ორგანიზმში გარდაქმნის პროდუქტი) 11-ნორ- D9-ტეტრაჰიდროკანაბინოლ-9- კარბოქსიმჟავა“, – ნათქვამია დასკვნაში.

ამავე დასკვნის თანახმად, ალექსანდრე ლაშქარავას გვამს აღენიშნებოდა სიცოცხლისდროინდელი დაზიანებები: სისხლნაჟღენთი მარცხნივ თვალბუდის მიდამოში, მარცხენა თვალბუდის მედიალური კედლის (ცხავის ძვლის აიროვანი უჯრედების) მარცხნივ თვალბუდის ფსკერის (ზედა ყბის ძვალია) მრავალფრაგმენტული მოტეხილობით და ჰემოსინუსიტით, სხეულზე სისხლნაჟღენთები და ნაჭდევები.

„სამედიცინო დოკუმენტაციის ჩანაწერებით – თავის ტვინის შერყევა, რქოვანას ტრავმული ეროზიო, თვალის კაკლის კომოციო, დაზიანებები ხანდაზმულობით არ ეწინააღმდეგებიან ალექსანდრე ლაშქარავას სტაციონარში მოთავსების თარიღს (2021 წლის 5 ივლისი). დაზიანებები განვითარებულია რაიმე მკვრივი – ბლაგვი საგნის მოქმედებით. ცოცხალ პირთა სასამართლო-სამედიცინო ექსპერტიზისას სხეულის დაზიანების ხარისხის განსაზღვრის დროს, დაზიანებები ერთობლიობაში აღებული ატარებენ ნაკლებად მძიმე ხარისხის დაზიანების ნიშნებს და არ იმყოფებიან მიზეზობრივ კავშირში დამდგარ შედეგთან“, – ნათქვამია დასკვნაში.

შინაგან საქმეთა სამინისტროსდან მოწოდებული ინფორმაციის თანახმად, უწყებამ დასკვნა 30 დეკემბერს მიიღო. დასკვნა 37-გვერდიანი, თუმცა უწყებამ მხოლოდ 6 გვერდი გაასაჯაროვა.

დოკუმენტს ხელს აწერს ლაშქარავას ოჯახის მიერ დამოუკიდებელ ექსპერტად მიწვეული ალექსანდრე გაჯაძე. ექსპერტი ამბობს, რომ კომენტარს მას შემდეგ გააკეთებს, რაც შინაგან საქმეთა სამინისტრო ოფიციალურად გაავრცელებს განცხადებას.

სამხარაულის დასკვნა მას შემდეგ გახდა ცნობილი, რაც UNESCO-მ ოპერატორი 2021 წელს მოკლული ჟურნალისტების სიაში შეიყვანა.

ახალგაზრდა იურისტთა ასოციაციაში, რომელიც ლაშქარავას ოჯახის ინტერესებს იცავს, აცხადებენ, რომ ექსპერტიზის დასკვნა კითხვებს აჩენს.

“მათ არ ჩართეს საერთაშორისო ექსპერტები ისე, როგორს ეს შემოთავაზებული იყო მათი მხრიდან. რამდენადაც ჩვენთვის ცნობილია, ექსპერტიზა ჩატარდა ქართველი ექსპერტების მიერ. რა თქმა უნდა, ჩვენ კითხვებს გვიბადებდა ის მომენტიც, რომ ლექსოს ცხედრის გადასვენება მოხდა, ოჯახის წინააღმდეგობის მიუხედავად ისე, რომ ჩვენ არ გვქონდა საშუალება ოთხი საათის განმავლობაში გვქონოდა წვდომა, თუ რა ხდებოდა ალექსოს ცხედართან დაკავშირებით და რაიმე მანიპულაცია ხომ არ მომხდარა. ესეც დამატებითი საკითხია, რაზედაც ჩვენ გვქონდა კითხვები”, – ამბობს საია-ს ხელმძღვანელი, ნიკა სიმონიშვილი.

შეგახსენებთ, რომ ლექსო ლაშქარავას 5 ივლისს „თბილისი პრაიდის“ მოწინააღმდეგეები ფიზიკურად გაუსწორდნენ. 11 ივლისს კი ის საკუთარ სახლში გარდაცვლილი იპოვეს.