სამძებრო სამუშაოების მეჩვიდმეტე დღე – რა ხდება სტიქიის ზონაში

ონის მუნიციპალიტეტში, სტიქიის ზონაში მეხანძრე-მაშველები, მეჩვიდმეტე დღეა, უწყვეტ რეჟიმში აგრძელებენ სამძებრო სამუშაოებს.

როგორც შსს-ში აცხადებენ, სტიქიის ზონაში სამძებრო სამუშაოები აქტიურად გრძელდება.

სამძებრო სამუშაოები მიმდინარეობს მდინარეების – რიონის და ჭანჭახის კალაპოტში, ასევე მასზე არსებულ კუნძულოვან მონაკვეთებზე, სადაც მობილიზებულია როგორც მძიმე ტექნიკა, ასევე ცოცხალი ძალა და კინოლოგთა ჯგუფი.

ონის მუნიციპალიტეტის მერის სერგო ხიდეშელის განცხადებით, ამ დროისთვის არსებული ინფორმაციით, შოვის ტრაგედიის შედეგად 27 ადამიანი გარდაიცვალა, რომელთაგან 25-ია იდენტიფიცირებული. ონის მერის განცხადებით, 6 მოქალაქის სამძებრო სამუშაოები ამ დრომდე მიმდინარეობს.

როგორც სერგო ხიდეშელმა აღნიშნა, გაზრდილია საძიებო სამუშაოების არეალიც.

„ამ დროისთვის არსებული ინფორმაციით, 27 მოქალაქეა გარდაცვლილი, 25-ია იდენტიფიცირებული და 6 მოქალაქის საძიებო სამუშაოები მიმდინარეობს. მოგეხსენებათ, გაზრდილია საძიებო სამუშაოების არეალი როგორც მდინარე ჭანჭახის, ასევე მდინარე რიონის კალაპოტში. მინდა, მადლობა ვუთხრა ყველა ჩართულ პირს, ყველა სტრუქტურას, ყველა სტრუქტურის წარმომადგენელს, ასევე მუნიციპალიტეტის მერებს, ჩემს კოლეგებს, გვერდში დგომისთვის“,- განაცხადა სერგო ხიდეშელმა.