სამტრედია-გრიგოლეთის მაგისტრალის ლანჩხუთი-ლესას მონაკვეთით მოსახლეობა უკვე სარგებლობს

სამტრედია-გრიგოლეთის ჩქაროსნული მაგისტრალის ლანჩხუთი-ლესას მონაკვეთით მოსახლეობა უკვე სარგებლობს – ამის შესახებ ინფორმაციას საქართველოს მთავრობა ავრცელებს.

როგორც გავრცელებულ ინფორმაციაშია ნათქვამი, გზის მშენებლობა 4 მონაკვეთად მიმდინარეობს, აქედან 2 დასრულებულია.

„მოსახლეობა სამტრედია-გრიგოლეთის ახლადგახსნილი ჩქაროსნული მაგისტრალის ლანჩხუთი-ლესას 8-კილომეტრიანი მონაკვეთით უკვე სარგებლობს. ლანჩხუთი-ლესას ახალი, 8-კილომეტრიანი მონაკვეთი 4-ზოლიანია. ჩქაროსნული მაგისტრალის აღნიშნულ მონაკვეთზე მოწყობილია 3 პარალელური ხიდი და ლანჩხუთისა და ლესას 2 სატრანსპორტო კვანძი.

სამტრედია-გრიგოლეთის 52-კილომეტრიანი მაგისტრალური გზის მშენებლობა 4 მონაკვეთად მიმდინარეობს. მე-2 და მე-4 მონაკვეთებით ავტოტრანსპორტი უკვე სარგებლობს. 1-ელი მონაკვეთი სამშენებლო პროცესშია. მე-3 12-კილომეტრიანი მონაკვეთის დარჩენილი 6 კილომეტრის სამშენებლო სამუშაოები კი აქტიურად გრძელდება. ამ დროისათვის დასრულებულია ქვის სვეტებისა და სადრენაჟე ფენის მოწყობა, მიმდინარეობს გზის საფარის დაგება და სახიდე ნაგებობების მშენებლობა. სამტრედია-გრიგოლეთის მე-3 მონაკვეთი კი რომელიც უკვე გაიხსნა, გადის გურიის რეგიონში და გვერდს აუვლის ქალაქ ლანჩხუთისა და სოფლების: გვიბალაურის, ქვემო ჩიბათისა და ნიგოეთის დასახლებულ ნაწილს.

საერთაშორისო მნიშვნელობის მაგისტრალის მშენებლობა გაზრდის სატრანსპორტო გამტარუნარიანობას, გააუმჯობესებს მოძრაობის უსაფრთხოებას და უზრუნველყოფს შეუფერხებელ სატრანზიტო კავშირს“, – ნათქვამია გავრცელებულ ინფორმაციაში.

სამტრედია-გრიგოლეთის მაგისტრალური გზის მესამე მონაკვეთის მშენებლობა ევროპის საინვესტიციო ბანკისგან (EIB) მიღებული სესხითა და სახელმწიფო თანადაფინანსებით ხორციელდება, რომლის საერთო მოცულობა 324.6 მილიონი ლარია.

www.bpn.ge