სალომე სამადაშვილი ოპოზიციის წარმომადგენლებს მოუწოდებს, ხელი არ მოაწერონ ცესკო-ში შემაჯამებელ ოქმებს

„ნაციონალური მოძრაობის“ ერთ-ერთი ლიდერი სალომე სამადაშვილი აცხადებს, რომ ხელისუფლებას გაყალბებული არჩევნების  ბათილად ცნობა მოუწევს.

დღეს გამართულ ბრიფინგზე სამადაშვილმა საზოგადოებას დღეს, 16:00 საათისთვის დაგეგმილ აქციაზე მისვლისკენ მოუწოდა.

ამასთან, სამადაშვილმა ცესკო-ში ოპოზიციიდან წარმოდგენილ საარჩევნო კომისიის წევრებს მიმართა, ხელი არ მოაწერონ შემაჯამებელ ოქმებს, რომლებიც მისი თქმით, გაყალბებულია.

„დღეს გავიღვიძეთ ახალ რეალობაში ბიძინა ივანიშვილმა ღამე დემოკრატია გააუქმა. მივმართავ, კომისიის წევრებს – ახლა მიმდინარეობს გაყალბებული არჩევნების შედეგების გაფორმება. ოპოზიციური პარტიებიდან კომისიაში წარმომადგენლებს სთხოვენ, ხელი მოაწერონ გაყალბებულ ოქმებს. მივმართავთ, ყველა კომისიის წევს, ხელი არ მოაწერონ არც ერთ ოქმს არავითარი ზეწოლისა და მუქარის შემთხვევაში“, – განაცხადა სამადაშვილმა.

მოსი თქმით, თამარ ჟვანიამ გააყალბა არჩევნების შედეგები და ეს უნდა იყოს ბოლო არჩევნები, როდესაც ჟვანია ცესკო-ს ხელმძღვანელობს. სალომე სამადაშვილი აცხადებს, რომ თამარ ჟვანიას პროფესიული პასუხისმგებლობა უნდა დაეკისროს.

„ივანიშვილი ცდილობს, ბოლომდე მოიყვანოს მასზე დაკისრებული მისია – გზის გადაკეტვა ევროპისა და ნატოს-კენ. არავის ეგონოს, რომ გუშინდელი გაყალბება არის მხოლოდ პოლიტიკური ძალაუფლების შენარჩუნების მცდელობა. მოვუწოდებთ ყველა მოქალაქეს, რომელიც გრძელი რიგების მიუხედავად მივიდა არჩევნებზე, თუ თქვენ გუშინ ხმა მიეცით ცვლილებას, თქვენ გითხრეს, რომ ხართ უუფლებო ადამიანები და არარაობები“, – განაცხადა სამადაშვილმა.

მისი თქმით, მოქალაქეებმა დღეს დაგეგმილ აქციაზე უნდა დაიცვან ხმები და საერთაშორისო ორგანიზაციებს გააგებინონ მათი პოზიცია, ისევე როგორც ეს, ოპოზიციამ გააკეთა.