სალომე ზურაბიშვილი: ჩვენს თავს უნდა ვკითხოთ – ყველაფერს ვაკეთებთ ისე, როგორც ქვეყანას სჭირდება?

სალომე ზურაბიშვილი აცხადებს, რომ 26 მაისი არა მხოლოდ დღესასწაული, არამედ დაფიქრების დღეა, როდესაც ყველა უნდა დაფიქრდეს, კეთდება თუ არა ყველაფერი ისე, როგორც ქვეყანას სჭირდება.

როგორც ზურაბიშვილმა 26 მაისის ღონისძიებაზე სიტყვით გამოსვლისას თქვა, პასუხისმგებლობას ვერავინ აირიდებს და მომავალზე უნდა დაფიქრდეს როგორც საზოგადოება, ასევე პოლიტიკოსები.

“26 მაისი მხოლოდ წარსულის გაცოცხლების დღე არ არის და არც ჩვეულებრივი დღესასწაული, არამედ დაფიქრების და გააზრების დღეა. დღე, როდესაც ჩვენს ქვეყანაზე უნდა ვიფიქროთ და ჩვენს თავს ვკითხოთ – ნუთუ ყველაფერს ვაკეთებთ ისე, როგორც ესაჭიროება ამ ქვეყანას, მის მომავალს, მისი მოსახლეობის კეთილდღეობას, დამოუკიდებლობასა და თავისუფლებას.

ეს კითხვა ყველამ თავის თავს უნდა დაუსვას, ყველა მოქალაქემ, ამ ქვეყნის ყველა შვილმა. აქ თუ საზღვრის მიღმა მცხოვრებმა, რამე თუ დამოუკიდებლობა სწორედ ამას ნიშნავს. ჩვენს ხელშია ჩვენი შვილების მომავალი. ამ პასუხისმგებლობას ვერავინ აირიდებს, თუმცა ეს დაფიქრება ცხადია უფრო ჩვენ გვევალება, ვინც ტრიბუნის აქეთ მხარეს ვდგავართ, რამე თუ მეტი პასუხისმგებლობა გვაკისრია.

ეს პასუხისმგებლობა მეტად გამძაფრებულია, რამეთუ საქართველო კიდევ ერთხელ, როგორც საკუთარი ისტორიის არაერთ მომენტში, გზაგასაყარზე. ჩვენს წინაშე ახალი შესაძლებლობების და გამოწვევების დრო დადგა. ეს ჩვენგან ითხოვს გარკვეულ პასუხებს, მზადყოფნას, შორსმჭვრეტელობას, მომავლის ხედვას და გამბედაობას, სიფრთხილესთან ერთად. მოითხოვს, ამას იმდენჯერ ვიტყვი, რამდენჯერაც საქმეს დასჭირდება – ერთიანობას”, – თქვა ზურაბიშვილმა.