სალომე ზურაბიშვილი – ბევრი სახით არის გამოხატული უკრაინის მიმართ სოლიდარობა, სწორედ ეს არის, რისი გაკეთებაც საქართველოს შეუძლია

არ ვფიქრობ, რომ რუსეთის მხარეს ბევრია საქართველოში. არის განსხვავებული მოსაზრებები, როგორ უნდა იყოს გამოხატული მხარდაჭერა. ერთი რამ ძალიან ცხადად არის ნაჩვენები და ეს არის საქართველოს მოსახლეობის მხარდაჭერა, – ამის შესახებ საქართველოს პრეზიდენტმა სალომე ზურაბიშვილმა „MSNBS“-თან ინტერვიუში განაცხადა.

მისივე თქმით, სოლიდარობა ბევრი სახით არის გამოხატული.

„მე, როგორც პრეზიდენტი, წარმოვადგენ საქართველოს მოსახლეობის პოზიციას უკრაინის მიმართ და ეს არის სრული სოლიდარობა. ძალიან ბევრი სახით არის გამოხატული სოლიდარობა. სწორედ ეს არის, რისი გაკეთებაც საქართველოს შეუძლია. ჩვენი სიტუაციის, ოკუპირებული რეგიონების და რესურსების გათვალისწინებით, ჩვენ არ შეგვიძლია შეიარაღების მიცემა, არ შეგვიძლია იმის გაკეთება, რისი გაკეთებაც ევროკავშირს და ნატო-ს შეუძლიათ, მაგრამ მორალური მხარდაჭერაც მნიშვნელოვანია და მე ამას მხარს ვუჭერ“, – განაცხადა სალომე ზურაბიშვილმა.

ამასთან, ზურაბიშვილმა აღნიშნა, რომ რუსეთი არ იცვლის მშვიდობიან მოქალაქეებზე თავდასხმის სტრატეგიას და სწორედ ამიტომ უნდა მოხდეს დასავლური სამყაროს მობილიზება, რადგან ეს მიუღებელია 21-ე საუკუნეში.

„ბუჩა მიუღებელია 21-ე საუკუნეში, კრამატორსკი მიუღებელია 21-ე საუკუნეში. ამან უნდა გააერთიანოს ყველა, ვინც იზიარებს დემოკრატიულ ღირებულებებს მსოფლიოში. ეს თქვენი, ჩემი საქმეა და ჩვენ ყველა ერთიანი ვართ ამ ღირებულებების დაცვაში“, – განაცხადა ზურაბიშვილმა.

ზურაბიშვილის განმარტებით, გზა, თუ როგორ იჭრება და მოქმედებს რუსეთი მეზობელ ქვეყნებში, არის მსგავსი.

„მსგავსება არ არის ქვეყნების ზომებში, ქვეყნების რესურსებში. ის გამძლეობა, რომელსაც უკრაინა იჩენს ამ სასტიკი აგრესიის წინაშე, არის ის, რაც აღგვაფრთოვანებს ყველას. ჩენი ქვეყნების ზომები ერთმანეთს არ შეედრება, მაგრამ ბრძოლა, რომელსაც ახლა უკრაინელები უძღვებიან, არ არის მხოლოდ თავიანთი ბრძოლა დამოუკიდებლობისთვის, არამედ ეს არის ბრძოლა ჩვენთვისაც. ასევე, ბრძოლა შავი ზღვის უსაფროებისთვის და თავისუფლებისთვის,  ევროპის დიდი ნაწილის უსაფრთხოებისა და თავისუფლებისთვის. ეს ყველას უნდა გვახსოვდეს“, – განაცხადა სალომე ზურაბიშვილმა.

ამავდროულად, პრეზიდენტი ამბობს, რომ რუსეთ-უკრაინის მოლაპარაკებებზე მნიშვნელოვანი იქნება იმის უზრუნველყოფა, რომ ყველა შესაძლებლობით იყოს გაკონტროლებული ყველა ელემენტი, რომელიც მოლაპარაკებებზე შეთანხმდება.

„ჩვენ გვაქვს ცეცხლის შეწყვეტის შეთანხმება რუსეთთან, მაგრამ ცეცხლის შეწყვეტის შეთანხმება სრულად არ არის დაცული. არის ევროკავშირის სადამკვირვებლო მისია გამყოფ ხაზზე და შეთანხმების მიხედვით, ამ მისიას უნდა შეეძლოს მოქმედება რუსეთის მიერ ოკუპირებულ ტერიტორიებზე. რუსეთ-უკრაინის მოლაპარაკებებზე მნიშვნელოვანი იქნება იმის უზრუნველყოფა, რომ ყველა შესაძლებლობით და რესურსით იყოს გაკონტროლებული ყველა ელემენტი, რომელიც შეთანხმდება მოლაპარაკებებზე. არაფერი უნდა გამორჩეთ. არ არსებობს დეტალები, რომელიც მნიშვნელოვანი არ არის. გარანტიები უნდა იყოს ეფექტური. ადგილზე უნდა იყვნენ ძალები ამ გარანტიისთვის“, – განაცხადა სალომე ზურაბიშვილმა.

გარდა ამისა, საქართველოს პრეზიდენტმა განაცხადა, რომ საქართველო არ იცვლის თავის გზას ევროპული და ევროატლანტიკური ინტეგრაციის მიმართულებით

„ომის შემდეგ, საქართველო არ იცვლის თავის გზას ევროპული და ევროატლანტიკური ინტეგრაციის მიმართულებით. ეს გზა გაგრძელდა, აჩქარდა, გაძლიერდა. რასაც დღეს ვხედავთ, როგორც ევროკავშირისგან და სტოლტენბერგის განცხადებებისგან, ორივე ორგანიზაცია აჩქარებს ღია კარის პოლიტიკას. ეს არ არის ორივესთვის მგავსი კვალიფიკაცია, მაგრამ ჩვენ ვხედავთ, რომ ხვალ ვიღებთ კითხვარს ევროკავშირისგან, რაც ძალიან მნიშვნელოვანი ნაბიჯია, რასაც არ ველოდებოდით სულ მცირე რამდენიმე წელი. პროცესი აჩქარდა უკრაინელების ბრძოლის დამსახურებით და იმ ფაქტის დამსახურებით, რომ ევროკავშირი დღეს ითვალისწინებს, რომ უნდა უპასუხოს სხვადასხვა გზით, უფრო მეტად პოლიტიკური გზით იმ პარტნიორთა მოლოდინებს, რომლებიც მის საზღვრებზე არიან და დიდი ხნის განმავლობაში ელოდებიან ევროკავშირთნ სულ უფრო მეტად დაახლოებას, ევროკავშირში გაწევრიანებას“, – აღნიშნა სალომე ზურაბიშვილმა.

www.1tv.ge