ოზურგეთის მუნიციპალიტეტის მერს ავთანდილ თალაკვაძეს უპოვართა სასადილოს ბენეფიციარებმა სპეციალური განცხადებით მიმართეს. ამ მიზნით დღეს სოციალურად დაუცველი მოსახლეობა მერიის ადმინისტრაციულ შენობასთან შეიკრიბა. როგორც შეკრებილები აცხადებენ, აქვთ ინფორმაცია, რომ მერია მათთვის სერვისის მიმწოდებელი ინდმეწარმის ტენდერის წესით ჩანაცვლებას გეგმავს, რასაც ბენეფიციარები აპროტესტებენ. როგორც თავად ამბობენ, იმ დარბაზში, სადაც ამჟამად საკვებს იღებენ, პირობებით კმაყოფილები არიან და მისი შეცვლა არ სურთ.
”ძალიან კარგი პირობებია, ნორმალურად გვექცევიან. მანამდე დოლიძის ქუჩაზე ვიყავით, სადაც ვიღაც ქუთაისელებს ჰქონდათ მოგებული ტენდერი და პირდაპირი მნიშვნელობით ბალანდას, სალაფავს გვაჭმევდნენ, უვარგისი ხორცი შემოჰქონდათ და გარემოც შენობაში გაუსაძლისად ბინძური იყო, მერე კოტე შარაშენიძემ და ირაკლი სირაძემ გვიპატრონეს და გადაგვიყვანეს ‘ნატალიში”, საიდანაც წასვლა არ გვსურს. ოღონდ დამატებით გვინდა, რომ კვების თანხა, 1,80 ლარი გაიზარდოს, რადგან ეს თანხა მიზერულია იმისთვის,რომ ადამიანი ნორმალურად გამოიკვებოს” – აცხადებენ ბენეფიციარები.
აღნიშნულ მოთხოვნებს სოციალურად დაუცველებმა განცხადების სახე მისცეს, რომელსაც 60 ადამიანი აწერს ხელს.
ოზურგეთის მუნიციპალიტეტის მერი ბენეფიციარებს საკუთარ კაბინეტში შეხვდა და მათი მოთხოვნების შესახებ მოისმინა. თალაკვაძემ მედიასთან კომენტარი არ გააკეთა, თუმცა როგორც შეხვედრიდან გამოსულმა მოქალაქეებმა აღნიშნეს, მერი ბენეფიციარებს ვითარებაში გარკვევას და მათი ინტერესების დაცვას დაპირდა.
უფასო სასადილო უკვე სამი წელია საბანკეტო დარბაზ ”ნატალიშია” განთავსებული. ბენეფიციარების კვებას ინდმეწარმე ნათია ღლოტი უზრუნველყოფს, თუმცა მერიის ინფორმაციით ღლონტის ხელშეკრულებას 31 დეკემბერს ვადა გასდის, შესაბამისად, მერიამ ახალი ტენდერი უნდა გამოაცხადოს.
მეორეს მხრივ, კი ბენეფიციარები აცხადებენ, რომ არ სურთ ინდმეწარმის შეცვლა, რადგან ძველი გამოცდილების გათვალისწინებით, როცა ”ნატალიმდე” მათი სასადილო დოლიძის ქუჩაზე მდებარეობდა და სრული ანტისანიტარია სუფევდა, ძველ პირობებში დაბრუნება აღარ სურთ.
კომენტარები
Loading ...