საქართველოს განათლებისა და მეცნიერების მინისტრის, გიორგი ამილახვარის გადაწყვეტილებით “ზოგადი განათლების შესახებ” საქართველოს კანონში ცვლილება შედის, რომლის მიხედვით, 2023-2024 სასწავლო წელს პირველ კლასში დარეგისტრირებას შეძლებენ ბავშვები, რომლებსაც 6 წელი 1-ელ ნოემბრამდე უსრულდებათ.
როგორც განათლებისა და მეცნიერების სამინისტრო განმარტავს, აღნიშნული გადაწყვეტილების საფუძველი მოქალაქეთა არაერთი განცხადება გახდა, რომლებიც საქართველოში დაწყებით საფეხურზე სწავლის დაწყების ასაკის გადახედვას ითხოვენ. მათივე ინფორმაციით, 6 წლამდე ბავშვების მშობლების მოთხოვნა გამონაკლისის დაშვების თაობაზე განსაკუთრებით მაღალია ოქტომბერში დაბადებულ ბავშვებთან დაკავშირებით, როგორც საჯარო, ასევე კერძო სკოლებში ჩარიცხვის მიზნით.
ამავდროულად, სოციალურ ქსელებში გავრცელდა ინფორმაცია, იმ ბავშვების სკოლაში შეყვანა, რომლებსაც 6 წელი პირველ ნოემბრამდე შეუსრულდებათ, სავალდებულოა და მათ საბავშვო ბაღებში დარჩებნის უფლებას არ მისცემენ. ინფორმაცია განათლებისა და მეცნიერების სამინისტროში გადავამოწმოთ.
მათი თქმით, წელს 1-ელ ნოემბრამდე დაბადებულ ბავშვებს უფლება ექნებათ, არჩევანი გააკეთონ: გააგრძელონ სკოლამდელი აღზრდისა და განათლების მომსახურების მიღება სასკოლო მზაობის პროგრამაში ჩართვით, ან დარეგისტრირდნენ პირველკლასელებად. ეს კი იმას ნიშნავს, რომ 1-ელ ნოემბრამდე დაბადებულ ბავშვებს ნებაყოფლობით შეუძლიათ ბაღში დარჩენა ან სკოლაში დარეგისტრირება და ეს სავალდებულო არ იქნება. როგორი მიდგომა იქნება შემდეგ წლებში, ამასთან დაკავშირებით, სამინისტრო ეტაპობრივად გაავრცელებს ინფორმაციას.
აღსანიშნავია, რომ 2023-2024 სასწავლო წლისთვის პირველკლასელთა ელექტრონული რეგისტრაცია 2023 წლის 6 მარტიდან 2023 წლის 20 მარტის ჩათვლით განხორციელდა და ხელმისაწვდომი იყო მხოლოდ იმ სსსმ ბავშვებისთვის, ვისაც 6 წელი უსრულდებათ 2023 წლის 1-ელ ოქტომბრამდე. ცვლილების შემდეგ 1-ელ ნოემბრამდე დაბადებულ სსსმ ბავშვებს მიეცემათ დამატებით რეგისტრაციის საშუალება და პირველ კლასში ჩარიცხვის შესაძლებლობა ექნებათ.
აღსანიშნავია, რომ რეგისტრაციის მეორე ეტაპი 2 მაისიდან 15 მაისის ჩათვლით იქნება შესაძლებელი და სკოლაში დარეგისტრირდებიან ის ბავშვები, რომელთა:
- და-ძმაც სწავლობს სასურველ სკოლაში;
- მშობელი/მეურვე/მზრუნველი სასურველი საჯარო სკოლის თანამშრომელია;
- ოჯახიდან ერთდროულად ორი ან მეტი ბავშვი შედის პირველ კლასში.
მეორე ეტაპზე რეგისტრაცია ხორციელდება საჯარო სკოლებში მშობლის/კანონიერი წარმომადგენლის მიერ ჩასარიცხად აუცილებელი დოკუმენტაციის წარდგენის საფუძველზე. რეგისტრაციას უზრუნველყოფს საჯარო სკოლა.
III ეტაპი – საყოველთაო რეგისტრაცია 17 მაისიდან დაიწყება და 9 ივნისის ჩათვლით გაგრძელდება.
რეგისტრაცია განხორციელდება განათლების მართვის საინფორმაციო სისტემის ოფიციალურ ვებგვერდზე registration.emis.ge. რეგისტრაციას უზრუნველყოფს მშობელი/კანონიერი წარმომადგენელი.
რაც შეეხება IV ეტაპს, რეგისტრაცია 28 ივნისიდან 12 ივლისის ჩათვლით სკოლებში განხორციელდება. ამ ეტაპზე დარჩენილ თავისუფალ ადგილებზე ან წინა ეტაპებზე გამოთავისუფლებულ ადგილებზე იმ მოსწავლეების რეგისტრაცია მოხდება, რომლებიც ვერ დარეგისტრირდნენ I, II და III ეტაპებზე.
მოქმედი კანონით, საქართველოს ყველა ზოგადსაგანმანათლებლო დაწესებულებაში სასწავლო წელი 15 სექტემბერს იწყება. თუ 15 სექტემბერი დასვენების ან უქმე დღეს ემთხვევა, სწავლა მის მომდევნო პირველ სამუშაო დღეს დაიწყება.
წყარო-მშობლები.გე
Loading ...
