საგრანტო კონკური სოციალური მეწარმეობის შესახებ

საქართველოს სტრატეგიული კვლევებისა და განვითარების ცენტრი (CSRDG) აცხადებს შრომითი ინტეგრაციის სოციალური საწარმოების (WISE) საგრანტო კონკურსს.

კონკურსის მიზანია იმ სოციალური საწარმოების მხარდაჭერა და განვითარება, რომლებიც ასაქმებენ შრომის ბაზარზე ნაკლებად კონკურენტუნარიან ადამიანებს და ხელს უწყობენ მათი პროფესიული უნარების განვითარებას.

საგრანტო კონკურსში მონაწილეობის მიღება შეუძლიათ შრომითი ინტეგრაციის მქონე როგორც მოქმედ საწარმოებს ასევე, სოციალური საწარმოს შექმნით დაინტერესებულ საინიციატივო ჯგუფებს – კახეთის, გურიისა და ქვემო ქართლის რეგიონებიდან.

კონკურსი ითვალისწინებს ფინანსურ (14 000 ევრომდე) და ტექნიკურ მხარდაჭერას, კონსულტაციებსა და ტრენინგებს ბიზნეს გეგმის წერის, მარკეტინგის, გაყიდვებისა და რესურსების მობილიზების საკითხებზე.

განაცხადის შემოტანის ბოლო ვადაა: 2021 წლის 25 ნოემბერი, 18:00 სთ. (დეტალურად კონკურსის შესახებ მოგვწერეთ CSRDG-ს Facebook გვერდზე ან გადადით ბმულზე https://bit.ly/3DTgL7f )

WISE-ების შესახებ სემინარი და კონკურსის საკონსულტაციო შეხვედრა გაიმართება 15 ნოემბერს, 11:00 საათზე ონლაინ. რეგისტრაციის ბმული

WISE-ის შესახებ

WISE ქმნის შრომის ბაზარზე ნაკლებად კონკურენტუნარიანი ადამიანების ეფექტური დასაქმების შესაძლებლობას და გვთავაზობს მათ საზოგადოებაში ინტეგრაციის ინოვაციურ გადაწყვეტას.

ასეთი სოციალური საწარმოები ნაკლებად კონკურენტუნარიან ჯგუფებს (მაგ.იძულებით გადაადგილებული პირები, კანონთან კონფლიქტში მყოფი პირები, შშმ პირები, გრძელვადიანად დაუსაქმებელი პირები და ა.შ.) რთავენ საქონლის ან მომსახურების წარმოების პროცესში და რეალიზაციაში, ყველაზე ხშირად ანაზღაურებადი დასაქმებით.

ამ მიდგომით სოციალური საწარმო ხელს უწყობს მათ ინტეგრაციას სამუშაო გარემოსა და საზოგადოებაში.

პროექტის შესახებ

საგრანტო კონკურსი ცხადდება, ევროკავშირის და „პური მსოფლიოსთვის“ მხარდაჭერით მიმდინარე პროექტის „უნარების გაძლიერება და დასაქმების ინოვაციური შესაძლებლობები საქართველოს რეგიონული განვითარებისთვის“ ფარგლებში. პროექტს ახორციელებს

საქართველოს სტრატეგიული კვლევებისა და განვითარების ცენტრი (CSRDG), ახალგაზრდა პედაგოგთა კავშირთან (YPU) და საქართველოს სამოქალაქო განვითარების ასოციაციასთან (GCDA) ერთად. პროექტის მიზანია  გურიის, კახეთისა და ქვემო ქართლის რეგიონებში  არსებული ადამიანური რესურსების მოზიდვითა და განვითარებით რეგიონის სოციალური და ეკონომიკური გაძლიერება.