საბედისწერო დაბადების დღეზე უთანხმოება ისევ საბურთალოელებსა და ნახალოვკელებს შორს მოხდა

20 წლის მირიან კუკავას მკვლელობის საქმეზე დაკავებულებს ბრალს დღეს ოფიციალურად წარუდგენენ. 8 საათისთვის დროებითი მოთავსების იზოლატორში ადვოკატები მივლენ.

უფლებადამცველების ინფორმაციით, საბედისწერო დაბადების დღეზე უთანხმოება ისევ საბურთალოელებსა და ნახალოვკელებს შორს მოხდა. კონფლიქტი თავიდან მხრის გაკვრის გამო დაიწყო, რაც მოგვიანებით ფიზიკურ ანგარიშსწორებაში გადაიზარდა და მკვლელობით დასრულდა.

უთანხმოება დაიწყო სახლის ეზოში, სადაც დაბადების დღის სუფრა იყო გაშლილი. ამის შემდეგ ისინი იქვე შერიგდნენ და ერთმანეთს მოუბოდიშეს კიდეც. ცოტა ხანში გახდა ცნობილი, რომ 2 ახალგაზრდა ეზოს გარეთ გავიდა, სადაც ტრაგიკული შემთხვევა მოხდა. ადვოკატები ამბობენ რომ ყველაფერი 10 წუთში მოხდა.

დაბადების დღეზე 32-35 კაცი იყო დააახლოებით, რომლებიც სუყველა გამოიკითხა. ჩხუბი მოუვიდათ საბურთალოელებს და ნახალოვკელებს, მხარი გაკრა ერთმა მეორეს და ამის ნიადაგზე სიტყვიერი შელაპარაკება დაიწყო და სიტყვიერი შელაპარაკების შემდეგ გადავიდა უკვე ჩხუბზე. უცებ გაქცეულან გარეთ და აი, მანდ მოხდა მკვლელობა. მოკლული ბიჭი იყო საბურთალოელი. [მოკლული და დამნაშავე] სავარაუდოდ, არ იცნობდნენ ერთმანეთს”,- ამბობს ადვოკატი. 

დროებითი მოთავსების იზოლატორი ცოტა ხნის წინ ორი მოწმის უფლებადამცველმა დატოვა.

“აღიარება, არაღიარებას რაც შეეხება, ჯერ ერთი ადამიანს ბრალი წარდგენილი არ აქვს. მეორე თავს შეუძლოდ გრძნობდა, მოგეხსენებათ, რომ კლინიკიდან გადმოიყვანეს. ჩაუტარდა სამედიცინო შემოწმება, ამჟამად თავს კარგად გრძნობს. დანიშნული აქვს სასამართლო-სამედიცინო ექსპერტიზა და შემდგომ უფრო ზუსტი სურათი იქნება”,- ამბობს ადვოკატი შოთა მანელიძე. 

20 წლის მირიან კუკავას ცივი იარაღით ჭრილობები გულ-მკერდის არეში ჰქონდა მიყენებული, ის ადგილზევე გარდაიცვალა. “მთავარი არხის” ინფორმაციით, იუბილარმა ქეთათო არაბულმა სამართალდამცველებს მიაწოდა ინფორმაცია, ვინ იყო ის პირი, რომელმაც 20 წლის ახალგაზრდას სასიკვდილო ჭრილობა მიაყენა. სავარაუდოდ, ეს ადამიანი დავით ჯიჯეიშვილია.

შეგახსენებთ, ცხვარიჭამიაში სისხლიანი დაპირისპირება გუშინ, 18 წლის გოგოს დაბადების დღის წვეულებაზე მოხდა, სადაც 50-მდე ადამიანი იმყოფებოდა. დაპირისპირებისას 20 წლის მირიან კუკავას გულ-მკერდის არეში ჭრილობები მიაყენეს, რის შედეგადაც ის ადგილზე გარდაიცვალა. შინაგან საქმეთა სამინისტრომ გამოძიება სსკ-ის 108-ე მუხლით დაიწყო, რაც განზრახ მკვლელობას გულისხმობს.